Давыдзька пра Дынько: «Чалавек выцер рукі аб абрус, плюнуў у калідоры і сышоў»
«Такое ўражанне, што чалавек выцер рукі аб абрус, яшчэ плюнуў у калідоры і сышоў», — так выказаўся кіраўнік Белдзяржтэлерадыёкампаніі Генадзь Давыдзька наўздагон удзелу ў перадачы «Клуб рэдактараў» рэдактара «Нашай Нівы» Андрэя Дынько.
Гнеў Генадзя Давыдзькі выклікала інтэрв'ю, якое пасля ўдзелу ў перадачы Андрэй Дынько даў радыё «Свабода».
«Праграма збудаваная такім чынам, што ўдзельнічаць у ёй цяжка. Сядзяць чатыры чалавекі з пэўнага лагера і адзін чалавек з незалежнага выдання. Праграма робіцца для таго, каб у такі хітры спосаб прыніжаць, уносіць раскол, дыскрэдытаваць недзяржаўныя выданні і апазіцыйных палітыкаў. Таму задача перад запрошаным чалавекам стаіць складаная, — адзначыў у інтэрв'ю Дынько. — Чытаю водгукі на інтэрнэт-форумах і сацыяльных сетках — людзі дзякуюць мне і хваляць тое, якім чынам я адказваў, і тыя думкі, якія я там выказаў. Людзі разумеюць, што гэта тое самае, як гуляць у футбол аднаму супраць чатырох».
«Разам з тым, я лічу, што якімі б ні былі цяжкімі ўмовы для дыялогу, вельмі важна, што хаця б у нейкіх формах ён адбываецца. Хай Давыдзька пабачыць Дынько ўжывую і пачуе яго меркаванне асабіста», — адзначыў разам з тым Дынько.
«Мне спадабаўся Дынько на нашай перадачы», — запярэчыў Давыдзьку рэдактар «Советской Белоруссіі» Павел Якубовіч. Але Якубовіч наракаў, што грамадства знаходзіцца «ў раз'юшаным стане» і не разумее, што такое кансалідацыя. На ягоную думку, «Клуб рэдактараў» робіць правільную справу, калі запрашае «людзей іншага кола».
Варта адзначыць, што ўчора гасцей з недзяржаўных СМІ ў студыі «Клуба рэдактараў» не было. Гаворка ішла, напрыклад, пра лёсавызначальнасць будучага Усебеларускага народнага сходу. «Мы ўсе цяпер маем вельмі вялікую патрэбу ва Усебеларускім сходзе», — казаў рэдактар «Гродзенскай праўды».
Нагадаем, што на папярэднім тыдні госцем «Клуба рэдактараў» упершыню быў рэдактар «Нашай Нівы». Адбылася жывая дыскусія. Вось відэа той праграмы.
Цяпер чытаюць
Расійскія прапагандысты выдумалі ўдар дрона па турыстычным аўтобусе. Але ў гісторыі ёсць загадкавыя фуры4
Каментары