Каб не плаціць падатак на сабак, мінчукі пачалі здаваць іх у пункты адлову
Валанцёры, якія дапамагаюць бяздомным жывёлам у мінскім пункце часовага ўтрымання «Фаўна горада» на вуліцы Гурскага, б’юць трывогу — няма свабодных вальераў.
Акрамя традыцыйнага папаўнення пункта жывёламі пасля адловаў ці знаходак на вуліцы, пачала расці колькасць чатырохлапых, ад якіх гаспадары адмаўляюцца праз пачатак дзеяння закона аб падатках на хатніх гадаванцаў. Найперш гэта тычыцца сабак.
«Сябры, на Гурскага ў Мінску ў «Фаўне горада» бяда. Пасля прыняцця новага закона, каб не рэгістраваць жывёл, іх цягнуць адусюль масава і здаюць, здаюць, здаюць ва ўсыпалку. Хатніх, неабароненых. Адлоў хапае без разбору ўсіх, хто на самавыгуле. У Беларусі абвешчаная вайна самым неабароненым і, безумоўна, поўным любові да чалавека істотам. Калі нехта думаў пра хатняга гадаванца — самы час», — напісала адна з зоаактывістак.
Толькі за два дні да валанцёраў на Гурскага паступіла 19 жывёл, свабодных вальераў і пакояў у іх не засталося — некалькім сабакам прыходзіцца туліцца ў адной клетцы.
Валанцёры пацвердзілі чытачцы «Нашай Нівы», што перапоўненасць вальераў звязаная ў тым ліку з пачаткам дзеяння з 1 ліпеня 2026 года падатку на сабак.
«Адмоўнікаў вельмі шмат. Здаюць штодзённа практычна. Частку жывёл ужо забралі, але толькі ў нас на сёння застаецца каля 10 адмоўнікаў, і іх колькасць будзе далей расці», — распавялі валанцёры.
Дапамагчы актывістам можна, забраўшы сабе аднаго з адмоўнікаў хаця б на часовую ператрымку.
З 2026 года ў Беларусі пачаў дзейнічаць падатак на сабак. Адначасова новыя нормы заканадаўства абавязваюць уладальнікаў рэгістраваць усіх хатніх жывёл, у тым ліку і катоў.
Падатак за валоданне сабакам складае 14 рублёў за квартал (калі ён патэнцыйна небяспечнай пароды — то 67 рублёў).
Зарэгістраваць сабак і катоў можна бясплатна ў мясцовай службе «Адно акно». За адсутнасць рэгістрацыі пагражае штраф ад 1 да 15 базавых адзінак (цяпер гэта ад 45 да 675 рублёў). А за нявыплату падатку прыйдзецца заплаціць 15% ад сумы запазычанасці.
Падпалкоўніка з факультэта вайсковай разведкі судзяць за «здраду дзяржаве» па справе, якая выглядае палітычнай. Што пра яго вядома?6
Каментары
Гаспадары якія здаюць сваіх сабакаў - гэта бяздушныя пачвары.