Kab nie płacić padatak na sabak, minčuki pačali zdavać ich u punkty adłovu
Vałanciory, jakija dapamahajuć biazdomnym žyviołam u minskim punkcie časovaha ŭtrymańnia «Faŭna horada» na vulicy Hurskaha, bjuć tryvohu — niama svabodnych valjeraŭ.
Akramia tradycyjnaha papaŭnieńnia punkta žyviołami paśla adłovaŭ ci znachodak na vulicy, pačała raści kolkaść čatyrochłapych, ad jakich haspadary admaŭlajucca praz pačatak dziejańnia zakona ab padatkach na chatnich hadavancaŭ. Najpierš heta tyčycca sabak.
«Siabry, na Hurskaha ŭ Minsku ŭ «Faŭnie horada» biada. Paśla pryniaćcia novaha zakona, kab nie rehistravać žyvioł, ich ciahnuć adusiul masava i zdajuć, zdajuć, zdajuć va ŭsypałku. Chatnich, nieabaronienych. Adłoŭ chapaje biez razboru ŭsich, chto na samavyhule. U Biełarusi abvieščanaja vajna samym nieabaronienym i, biezumoŭna, poŭnym lubovi da čałavieka istotam. Kali niechta dumaŭ pra chatniaha hadavanca — samy čas», — napisała adna z zoaaktyvistak.
Tolki za dva dni da vałancioraŭ na Hurskaha pastupiła 19 žyvioł, svabodnych valjeraŭ i pakojaŭ u ich nie zastałosia — niekalkim sabakam prychodzicca tulicca ŭ adnoj kletcy.
Vałanciory paćvierdzili čytačcy «Našaj Nivy», što pierapoŭnienaść valjeraŭ źviazanaja ŭ tym liku z pačatkam dziejańnia z 1 lipienia 2026 hoda padatku na sabak.
«Admoŭnikaŭ vielmi šmat. Zdajuć štodzionna praktyčna. Častku žyvioł užo zabrali, ale tolki ŭ nas na siońnia zastajecca kala 10 admoŭnikaŭ, i ich kolkaść budzie dalej raści», — raspaviali vałanciory.
Dapamahčy aktyvistam možna, zabraŭšy sabie adnaho z admoŭnikaŭ chacia b na časovuju pieratrymku.
Z 2026 hoda ŭ Biełarusi pačaŭ dziejničać padatak na sabak. Adnačasova novyja normy zakanadaŭstva abaviazvajuć uładalnikaŭ rehistravać usich chatnich žyvioł, u tym liku i katoŭ.
Padatak za vałodańnie sabakam składaje 14 rubloŭ za kvartał (kali jon patencyjna niebiaśpiečnaj parody — to 67 rubloŭ).
Zarehistravać sabak i katoŭ možna biaspłatna ŭ miascovaj słužbie «Adno akno». Za adsutnaść rehistracyi pahražaje štraf ad 1 da 15 bazavych adzinak (ciapier heta ad 45 da 675 rubloŭ). A za niavypłatu padatku pryjdziecca zapłacić 15% ad sumy zapazyčanaści.
Kamientary
Haspadary jakija zdajuć svaich sabakaŭ - heta biazdušnyja pačvary.