Biełarusy dzielacca, jak rehistrujuć svaich katoŭ. Voś jak adbyvajecca pracedura
Z 2026 hoda ŭ Biełarusi pačaŭ dziejničać padatak na sabak. Adnačasova novyja normy zakanadaŭstva abaviazvajuć uładalnikaŭ rehistravać usich chatnich žyvioł, u tym liku i katoŭ.
Niekatoryja biełarusy ŭžo zarehistravali svaich katoŭ i padzialilisia dośviedam.
Minčanka Kryścina vypraviłasia rehistravać kata paśla vizitu ŭčastkovaha milicyjaniera, jaki napužaŭ jaje jašče i tym, što za čatyrochłapaha treba zapłacić padatak. Nasamreč padatku na katoŭ na hety momant niama — tolki dla haspadaroŭ sabak.
Dla afarmleńnia kata varta zavitać u miascovuju słužbu «Adno akno». Z saboj treba mieć pašpart — vaš i, pry najaŭnaści, vieterynarny pašpart žyvioły. Kali čarha ŭ administracyi elektronnaja, abiarycie punkt «rehistracyja chatnich žyvioł», kab uziać tałončyk.
«Zapaŭniajecca infarmacyja — vašy pašpartnyja dadzienyja, mianuška kata, jaho hod narodzinaŭ, kastryravany hadavaniec ci nie. Na ruki paśla vydajecca rehistracyjnaje paśviedčańnie. Paźniej vas vykličuć, kab zabrać žeton kata», — raskazvaje Kryścina.
Kali vy nie majecie svajho žytła, a zdymajecie jaho, to z saboj varta budzie mieć taksama damovu na arendu, dzie prapisany dazvoł na ŭtrymańnie kata (alternatyva — pryjści na rehistracyju razam z ułaśnikam kvatery).
U siecivie ŭžo žartujuć, što katam zastałosia pačać vydavać pracoŭnyja knižki, a paśla i piensijnaje paśviedčańnie.
«U mianie kotka chutka narodzić, dzie ŭstać na ŭlik, kab atrymlivać dapamohu na 6‑7 niepaŭnaletnich?» — pažartavała adna ź biełarusak.
Rehistracyja žyvioł biaspłatnaja. A voś štraf za jaje adsutnaść pry vyjaŭleńni — ad 1 da 15 bazavych vieličyń (ciapier heta ad 45 da 675 rubloŭ).
Varta dadać, što ŭ vypadku śmierci žyvioły pa zakonie taksama rekamiendujecca apaviaścić pra heta vykankam ci administracyju vašaha nasielenaha punkta, kab kata ci sabaku źniali z uliku.
Jak čynoŭniki daviedajucca, što ŭ mianie žyvie kot, kali jon nie pakidaje kvateru?
U vypadku z sabakami padatkovaja inśpiekcyja ŭžo nakiravała pieršyja zapyty ŭ vieterynarnyja kliniki nakont haspadaroŭ, jakija źviartalisia da ich u 2025 hodzie. To-bok vieterynary, a taksama ŭładalniki haścinic dla žyvioł i kinołahi buduć abaviazanyja davać takuju infarmacyju.
Dadatkova pra niezarehistravanych žyvioł mohuć paviedamlać supracoŭniki ŽKH, supracoŭniki milicyi. Nikudy nie dziecca i ad nieabyjakavych susiedziaŭ.
Dziela čaho heta robicca?
Asnoŭnaja meta rehistracyj — kantrol kolkaści žyvioł (tak, aficyjna nielha ŭtrymlivać u kvatery bolš za dvuch hadavancaŭ), a taksama spraščeńnie pošukaŭ kata ci sabaki, kali jany vypadkova zhubiacca.
U budučyni płanujecca stvaryć adziny ličbavy rejestr žyvioł, dzie budzie prapisanaja ŭsia ich bijahrafija.
Kamientary
a ja ŭ muža paŭvieka ŭžo pa
chodu niezarehistravanaja jak žyvu