IVAN прадстаўляў Беларусь на «Еўрабачанні» голым і з ваўком. Дзе гэты хлопец праз 10 гадоў?
У 2016‑м Саша Іваноў (IVAN) з Гомеля з’явіўся на сцэне «Еўрабачання» ў выглядзе аголенай галаграмы ды ў кампаніі з ваўком, а праз некалькі секунд распачаў выступ сапраўдным выццём. Што цяпер чуваць у самага эпатажнага беларуса на «Еўрабачанні»?
Іваноў выйграў нацыянальны адбор, у якім спаборнічаў з гуртам «Навібэнд» і будучай палітзняволенай Аляксандрай Захарык. Песню Help You Fly хлопцу напісалі чатыры аўтары, у тым ліку топавы расійскі прадзюсар Віктар Дробыш і амерыканская паэтка Мэры Сюзан Эплгейт, аўтарка слоў да культавага хіта 80‑х The Power of Love.
Нумар хлопцу паставілі запамінальны. У першыя 20 секунд замест уласна Іванова на сцэне з’явілася яго аголеная галаграма ў кампаніі з галаграмай ваўка, і штучны IVAN распачаў выступ ваўчыным выццём. Далей на сцэну выйшаў сам хлопец — на шчасце, у адзенні, затое з размаляваным тварам. Спяваў ён усё гэтак жа з галаграмамі: гэта былі то ваўкі, то сам Іваноў, які граў на музычных інструментах.
Тэхнічнае шоу не дапамагло нават выйсці ў фінал, не кажучы пра высокае выніковае месца. IVAN стаў у сваім паўфінале 12‑м — усяго тады выступіла 18 краін.
Цяпер 31‑гадовы Саша Іваноў робіць кар’еру ў Маскве. У першыя гады пасля «Еўрабачання» ён паўдзельнічаў у некалькіх канцэртах, звязаных з Віктарам Дробышам. Выпускаў песні, якія так і не выбіліся ў хіты.
Справы трохі палепшалі ў 2023-м, калі IVAN прабіўся на расійскае шоу «Маска», што на НТВ, хаця і выступаў ён там у касцюме вусеня. У 2024‑м ён перамог у падобным шоу «Аватар», дзе на гэты раз выступаў у вобразе Страшыдлы.
У Маскве мужчына знайшоў і сваё каханне. Ён публікуе сямейныя фоты з Алінай Сухарукіх, папулярнай танцоркай і харэографкай, якая нарадзіла беларусу дачку.
Яшчэ з 2019‑га Іваноў удзельнічае ў канцэртах расійскага спевака Мікалая Наскова. IVAN дагэтуль звязаны з ім — сёлета, напрыклад, ён ужо чатыры разы выступіў у складзе афіцыйнага трыб'ют-шоу спевака, то-бок Іваноў ездзіць па Расіі і спявае песні Наскова.
Беларус выступаў і на акупаваных тэрыторыях Украіны, напрыклад, вясной 2022 года ён паўдзельнічаў у канцэрце ад «Рускага радыё» ў Луганску. Спяваў ён і ў шпіталі для параненых расійскіх вайскоўцаў. Вынік прадказальны — Іваноў знаходзіцца пад украінскімі санкцыямі.
«Наша Нiва» — бастыён беларушчыны
ПАДТРЫМАЦЬ
Каментары