IVAN pradstaŭlaŭ Biełaruś na «Jeŭrabačańni» hołym i z vaŭkom. Dzie hety chłopiec praz 10 hadoŭ?
U 2016‑m Saša Ivanoŭ (IVAN) z Homiela źjaviŭsia na scenie «Jeŭrabačańnia» ŭ vyhladzie aholenaj hałahramy dy ŭ kampanii z vaŭkom, a praź niekalki siekund raspačaŭ vystup sapraŭdnym vyćciom. Što ciapier čuvać u samaha epatažnaha biełarusa na «Jeŭrabačańni»?
Ivanoŭ vyjhraŭ nacyjanalny adbor, u jakim spaborničaŭ z hurtam «Navibend» i budučaj palitźniavolenaj Alaksandraj Zacharyk. Pieśniu Help You Fly chłopcu napisali čatyry aŭtary, u tym liku topavy rasijski pradziusar Viktar Drobyš i amierykanskaja paetka Mery Siuzan Epłhiejt, aŭtarka słoŭ da kultavaha chita 80‑ch The Power of Love.
Numar chłopcu pastavili zapaminalny. U pieršyja 20 siekund zamiest ułasna Ivanova na scenie źjaviłasia jaho aholenaja hałahrama ŭ kampanii z hałahramaj vaŭka, i štučny IVAN raspačaŭ vystup vaŭčynym vyćciom. Dalej na scenu vyjšaŭ sam chłopiec — na ščaście, u adzieńni, zatoje z razmalavanym tvaram. Śpiavaŭ jon usio hetak ža z hałahramami: heta byli to vaŭki, to sam Ivanoŭ, jaki hraŭ na muzyčnych instrumientach.
Techničnaje šou nie dapamahło navat vyjści ŭ finał, nie kažučy pra vysokaje vynikovaje miesca. IVAN staŭ u svaim paŭfinale 12‑m — usiaho tady vystupiła 18 krain.
Ciapier 31‑hadovy Saša Ivanoŭ robić karjeru ŭ Maskvie. U pieršyja hady paśla «Jeŭrabačańnia» jon paŭdzielničaŭ u niekalkich kancertach, źviazanych ź Viktaram Drobyšam. Vypuskaŭ pieśni, jakija tak i nie vybilisia ŭ chity.
Spravy trochi palepšali ŭ 2023-m, kali IVAN prabiŭsia na rasijskaje šou «Maska», što na NTV, chacia i vystupaŭ jon tam u kaściumie vusienia. U 2024‑m jon pieramoh u padobnym šou «Avatar», dzie na hety raz vystupaŭ u vobrazie Strašydły.
U Maskvie mužčyna znajšoŭ i svajo kachańnie. Jon publikuje siamiejnyja foty z Alinaj Sucharukich, papularnaj tancorkaj i chareohrafkaj, jakaja naradziła biełarusu dačku.
Jašče z 2019‑ha Ivanoŭ udzielničaje ŭ kancertach rasijskaha śpievaka Mikałaja Naskova. IVAN dahetul źviazany ź im — sioleta, naprykład, jon užo čatyry razy vystupiŭ u składzie aficyjnaha trybjut-šou śpievaka, to-bok Ivanoŭ jeździć pa Rasii i śpiavaje pieśni Naskova.
Biełarus vystupaŭ i na akupavanych terytoryjach Ukrainy, naprykład, viasnoj 2022 hoda jon paŭdzielničaŭ u kancercie ad «Ruskaha radyjo» ŭ Łuhansku. Śpiavaŭ jon i ŭ špitali dla paranienych rasijskich vajskoŭcaŭ. Vynik pradkazalny — Ivanoŭ znachodzicca pad ukrainskimi sankcyjami.
«Naša Niva» — bastyjon biełaruščyny
PADTRYMAĆCiapier čytajuć
«Na karabli kožny dzień — paniadziełak». Biełaruska raskazała pra svaju pracu na kruiznym łajniery6
Kamientary