Археолагі расказалі, як раскопваюць Сінагагальны двор у Ізабеліне
Працягваюцца археалагічныя даследаванні мястэчка Ізабелін у Ваўкавыскім раёне, паведамляе Інстытут гісторыі НАНБ. У канцы мінулага года там выявілі падмуркі невядомай пабудовы. Як аказалася, гэта былі канструкцыі так званай «Кляйнэ Шуль» — малой сінагогі Ізабеліна, узведзенай у 80‑х гадах XVIII стагоддзя.
У сувязі з рэстаўрацыйнай працай патрабуецца археалагічны нагляд за землянымі даследаваннямі на аб’екце, які робіць вядучы навуковы супрацоўнік Інстытута гісторыі НАН Беларусі Алег Дзярновіч.
У новым сезоне выявілі масіўную лінію каменнага падмурка каля дарогі ў цэнтры мястэчка. Гэта агароджа Сінагагальнага двара Ізабеліна, што дазваляе акрэсліць параметры гэтай канфесійна-карпаратыўнай структуры XVIII — першай паловы XX стагоддзя ў цэнтры мястэчка.
Акрамя таго, была знойдзена цікавая калекцыя артэфактаў, у тым ліку набор «дывановай» кафлі з геаметрычным арнаментам ад печкі XVII стагоддзя, што сведчыць пра наяўнасць пабудоў у гэтым месцы ў адзначаны перыяд. Пра актыўную гандлёвую дзейнасць у мястэчку сведчыць і знаходка шкляной пломбы ад бутэлькі (кварты) джыну XVIII стагоддзя, магчыма контрафактнай, з кляймом «LOND(O)N».
Далейшыя даследаванні, а таксама захаванне і магчымае дэманстраванне аб’екта магчымыя толькі ў межах усяго комплексу Сінагагальнага двара XVIII — першай паловы XX стст., гістарычна ўтворанага ва ўсходняй частцы Галоўнай (Рынкавай) плошчы Ізабеліна.
Падчас рэстаўрацыі сінагогі ў Ваўкавыскім раёне знайшлі падмурак невядомага будынка
У Ізабеліне аднаўляюць сінагогу, пабудаваную ў часы Вялікага Княства Літоўскага
У Літве апублікавалі шэраг архіўных спраў з фотаздымкамі Яна Булгака
На Новым замку ў Гродне адшукалі падмуркі старажытнага храма, падобнага па архітэктуры да Каложы
Цяпер чытаюць
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна16
Каментары