У Ізабеліне аднаўляюць сінагогу, пабудаваную ў часы Вялікага Княства Літоўскага
Пасля больш як паўстагоддзя дэградацыі і занядбання помнік архітэктуры зноў набывае сваё гістарычнае аблічча.
Пасля правядзення супрацьаварыйных работ, умацавання расколатых сцен скрэпамі, а таксама закладкі праёмаў, будынак у вёсцы Ізабелін Ваўкавыскага раёна накрываюць часовым дахам. Новы дах робяць ярусным, якім і быў дах сінагогі ў пачатку XX стагоддзя.
Ізабелінскі кагал, падпарадкаваны Мсібаўскаму, быў заснаваны ў 1777 годзе. Прыкладна тады ж, у другой палове XVIII стагоддзя, была ўзведзена мураваная сінагога.
Станам на 1897 год у Ізабеліне пражывалі 454 яўрэяў, у 1921 годзе іх стала ўжо 1709. Сын ізабелінскага рабіна Якава Меіра Краўчынскага, рабін Зеэў Голд, быў адным з лідараў сіянісцкай арганізацыі «Мізрахі» ў ЗША, а ў маі 1948 года падпісаў Дэкларацыю незалежнасці дзяржавы Ізраіль.
У пачатку 1942 года нацысты стварылі ў Ізабеліне гета, якое ліквідавалі ўжо ў лістападзе, расстраляўшы 31 чалавека. Астатніх яўрэяў пагналі ў лагер у Ваўкавыску, а адтуль у лагер смерці Аўшвіц.
Пасля вайны будынак быў моцна перабудаваны. Сінагогу выкарыстоўвалі пад розныя сельскагаспадарчыя патрэбы, у тым ліку вяндлярны цэх і бар. У апошнія гады будынак стаяў пусты.
Ізабелінскую сінагогу ў сваю ўласнасць прыдбаў «Маёнтак Падароск», які аднаўляў сядзібу Бохвіцаў у недалёкім Падароску і фінансаваўся бізнэсоўцам і мецэнатам беларускага паходжання Паўлам Падкарытавым. Існавала ідэя аб стварэнні на базе сінагогі адукацыйнага цэнтра па захаванні культурнай спадчыны Ізабеліна.
Праблемы ў турыстычнага прадпрыемства «Падароск» з'явіліся ў 2022 годзе, калі супраць яго супрацоўнікаў пачалі крымінальны пераслед па абвінавачванні ў нясплаце падаткаў і страхавых унёскаў з заробкаў работнікаў амаль на 400 000 рублёў.
Крымінальная справа ўрэшце была спынена, але сядзібу, якая з'яўляецца гісторыка-культурнай каштоўнасцю, у Падкарытава забралі ў дзяржаўную ўласнасць. Ізабелінская сінагога ж ахоўнага статусу не мела.
«Наша Нiва» — бастыён беларушчыны
ПАДТРЫМАЦЬУ капліцы пад Смаргонню панішчылі саркафагі і раскідалі чалавечыя парэшткі
З'явіліся сцены і брама — глядзіце, як змяніўся Навагрудскі замак
Рэстаўрацыі ў Беларусі засталося на тры дні. Галоўнаму прадпрыемству краіны фактычна падпісалі смяротны прысуд
У Будслаўскім касцёле раскрылі невядомыя раней роспісы
Як выглядае сусветна вядомая яўрэйская семінарыя ў Валожыне пасля рэстаўрацыі — шмат ФОТА
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3232
Каментары