Мужчына спрабаваў замовіць забойства дзяўчыны, каб адпомсціць за смерць сына
Жыхар Багушэўска спрабаваў арганізаваць забойства дзяўчыны, якую лічыў вінаватай у гібелі свайго сына, — у выніку ён трапіў у сетку падстаўнога кілера і сам атрымаў тэрмін.
Падрабязнасці рэзананснай справы расказаў газеце «Віцьбічы» следчы, які раскрыў злачынства.
Трагедыя адбылася ў маі 2018 года. У ДТЗ загінулі двое маладых людзей. Аўтамабілем кіравала знаёмая кампаніі, якая нядаўна атрымала правы. На закругленні дарогі яна страціла кіраванне, выехала на сустрэчную паласу і сутыкнулася з «Нівай». Дзяўчына-пасажырка загінула на месцы, а хлопец пазней памёр у бальніцы.
Следства ўстанавіла, што аварыя здарылася па віне вадзіцелькі. Суд прыгаварыў яе да пяці гадоў пазбаўлення волі ў калоніі-паселішчы. Асуджаная прызнала віну і не абскардзіла прысуд.
Аднак бацька загінулага хлопца лічыў пакаранне занадта мяккім і вырашыў адпомсціць. Паводле даных следства, мужчына праз знаёмых пачаў шукаць выканаўцу для забойства. За расправу над жанчынай ён абяцаў узнагароду $1000.
Спроба знайсці кілера прывяла да таго, што мужчына апынуўся пад кантролем міліцыі: чалавек, які прадставіўся найманым забойцам, на самой справе супрацоўнічаў з органамі. Заказчык накіраваў яго ў месца адбыцця пакарання асуджанай, каб той сфатаграфаваў «ахвяру» і пацвердзіў, што гэта патрэбны чалавек.
Пазней аператыўнікі інсцэніравалі забойства і прадставілі заказчыку падробленыя доказы. Пасля гэтага мужчыну затрымалі пры спробе разлічыцца з «кілерам».
У адносінах да мужчыны была заведзена крымінальная справа. Суд прызнаў яго вінаватым у арганізацыі заказнога забойства і прыгаварыў да шасці гадоў пазбаўлення волі. Свой тэрмін ён ужо адбыў, як і вінаватая ў тым самым ДТЗ — абодва больш не жывуць у Багушэўску.
Цяпер чытаюць
У мінскім гандлёвым цэнтры Palazzo сабралася даўжэзная чарга. Па дармовых мядзведзікаў!5
Каментары