У Кіеве за шпіянаж арыштавалі беларускую журналістку Іну Кардаш. Кажуць, з 2015 года яна працавала на КДБ
Украінскія спецслужбы заявілі пра арышт беларускай журналісткі, з якой некалькі месяцаў вялі аператыўную гульню, пастаўляючы дэзынфармацыю. І хаця твар затрыманай не паказалі, «Наша Ніва» вылічыла, пра каго ідзе гаворка — гэта Іна Кардаш. Як сцвярджаецца, ва Украіне яна збірала інфармацыю пра добраахвотнікаў.
«У межах сумеснай працяглай і комплекснай спецаперацыі падраздзялення ўласнай бяспекі ГУР МА Украіны і следчых СБУ пад працэсуальным кіраўніцтвам Офіса Генеральнага пракурора Украіны выкрылі шпіёнку беларускага КДБ, якая спрабавала інфільтравацца ў адно з падраздзяленняў украінскай ваеннай выведкі.
35‑гадовую варожую агентку затрымалі ў Кіеве, ёй абвешчанае падазрэнне ў шпіянажы.
У ходзе спецаперацыі, якая доўжылася некалькі месяцаў, супрацоўнікі СБУ і ўласнай бяспекі ГУР дакументавалі злачынную дзейнасць беларускай шпіёнкі і вялі з ёй аператыўную гульню — пад выглядам сакрэтных звестак ёй перадавалі дэзынфармацыю.
ГУР сцвярджае, што агентка працавала на беларускі КДБ з 2015 года і ў 2020 годзе яе накіравалі для агентурнай працы на тэрыторыю Украіны. Прыкрыццём служыла журналісцкая дзейнасць — пасля працы на падсанкцыйным канале Медзведчука «112» шпіёнка ўладкавалася ў адно з вядучых медыя Украіны.
Далей, па загадзе куратара, пад легендай неабходнасці медыцынскага абследавання жанчына выехала на дадатковы інструктаж у адну з краін ЕС. Ад чэкістаў яна атрымала заданне збіраць інфармацыю пра беларусаў і расіян, якія ваююць супраць дзяржавы-агрэсара на баку Украіны.
Таксама беларуская шпіёнка павінна была ўстанавіць сувязі з супрацоўнікамі пасольства КНР у Кіеве, каб сабраць інфармацыю пра дзейнасць кітайскіх дыпламатаў ва Украіне.
Пасля збору аб’ёмнай доказнай базы варожую агентку затрымалі ў Кіеве, канфіскавалі смартфон і дыктафон, якія яна выкарыстоўвала для збору закрытай інфармацыі.
На гэты момант шпіёнка знаходзіцца пад вартай. Ёй пагражае да 15 гадоў пазбаўлення волі з канфіскацыяй маёмасці», — гаварылася ў паведамленні ГУР, апублікаваным сёння раніцай.
Неўзабаве, аднак, допіс быў чамусьці выдалены з канала ведамства.
Супаставіўшы фота і дэталі біяграфіі, мы пераканаліся, што гаворка ідзе пра ўраджэнку Мінска Іну Кардаш, якая нарадзілася ў 1991 годзе.
Паводле выпісак з базы Belpol, Кардаш у 2012‑-2015 працавала ў кампаніях «Юнайтэд компані» і «Максбэт». З 2015 да 2018 года ў базах ФСАН пуста, у 2018—2019 супрацоўнічала з «Тутбаймедыя».
Пасля гэтага Кардаш працавала як журналіст-фрылансерка на многія замежныя медыя, якія часам шукалі выканаўцаў на месцах.
Пры гэтым як аператар ёй часта акампанаваў Васіль Сямашка, які ўвайшоў у гісторыю як правакатар, з дапамогай якога КДБ у 2018‑м арыштаваў украінскага журналіста Паўла Шаройку.
З 2020 года Кардаш стала афіцыйна працаваць на тэлеканал «Украіна» ў Беларусі. Некалькі разоў яе затрымлівалі пры асвятленні пратэстаў. Напрыклад, пасля затрымання 16 жніўня 2020 года ў базе «Беспарадкі» з'явіўся наступны запіс: «Праведзены захады індывідуальнай прафілактыкі або абвешчана вуснае папярэджанне».
Імаверна, у канцы 2020 года Кардаш выехала з Беларусі.
Ва Украіне яна працавала на тэлеканал 112.ua, а пасля на мясцовы «Інтэрфакс».
«Наша Нiва» — бастыён беларушчыны
ПАДТРЫМАЦЬ
Каментары
БелОруССкая журналистка ИННА КАРДАШ . Гэта ж старажытныя нашыя магнаты . Кардашы . Ці вы ня ведалі ?