U Kijevie za špijanaž aryštavali biełaruskuju žurnalistku Inu Kardaš. Kažuć, z 2015 hoda jana pracavała na KDB
Ukrainskija śpiecsłužby zajavili pra aryšt biełaruskaj žurnalistki, ź jakoj niekalki miesiacaŭ viali apieratyŭnuju hulniu, pastaŭlajučy dezynfarmacyju. I chacia tvar zatrymanaj nie pakazali, «Naša Niva» vyličyła, pra kaho idzie havorka — heta Ina Kardaš. Jak śćviardžajecca, va Ukrainie jana źbirała infarmacyju pra dobraachvotnikaŭ.
«U miežach sumiesnaj praciahłaj i kompleksnaj śpiecapieracyi padraździaleńnia ŭłasnaj biaśpieki HUR MA Ukrainy i śledčych SBU pad pracesualnym kiraŭnictvam Ofisa Hienieralnaha prakurora Ukrainy vykryli špijonku biełaruskaha KDB, jakaja sprabavała infiltravacca ŭ adno z padraździaleńniaŭ ukrainskaj vajennaj vyviedki.
35‑hadovuju varožuju ahientku zatrymali ŭ Kijevie, joj abvieščanaje padazreńnie ŭ špijanažy.
U chodzie śpiecapieracyi, jakaja doŭžyłasia niekalki miesiacaŭ, supracoŭniki SBU i ŭłasnaj biaśpieki HUR dakumientavali złačynnuju dziejnaść biełaruskaj špijonki i viali ź joj apieratyŭnuju hulniu — pad vyhladam sakretnych źviestak joj pieradavali dezynfarmacyju.
HUR śćviardžaje, što ahientka pracavała na biełaruski KDB z 2015 hoda i ŭ 2020 hodzie jaje nakiravali dla ahienturnaj pracy na terytoryju Ukrainy. Prykryćciom słužyła žurnalisckaja dziejnaść — paśla pracy na padsankcyjnym kanale Miedźviedčuka «112» špijonka ŭładkavałasia ŭ adno ź viadučych miedyja Ukrainy.
Dalej, pa zahadzie kuratara, pad lehiendaj nieabchodnaści miedycynskaha abśledavańnia žančyna vyjechała na dadatkovy instruktaž u adnu z krain ES. Ad čekistaŭ jana atrymała zadańnie źbirać infarmacyju pra biełarusaŭ i rasijan, jakija vajujuć suprać dziaržavy-ahresara na baku Ukrainy.
Taksama biełaruskaja špijonka pavinna była ŭstanavić suviazi z supracoŭnikami pasolstva KNR u Kijevie, kab sabrać infarmacyju pra dziejnaść kitajskich dypłamataŭ va Ukrainie.
Paśla zboru abjomnaj dokaznaj bazy varožuju ahientku zatrymali ŭ Kijevie, kanfiskavali smartfon i dyktafon, jakija jana vykarystoŭvała dla zboru zakrytaj infarmacyi.
Na hety momant špijonka znachodzicca pad vartaj. Joj pahražaje da 15 hadoŭ pazbaŭleńnia voli z kanfiskacyjaj majomaści», — havaryłasia ŭ paviedamleńni HUR, apublikavanym siońnia ranicaj.
Nieŭzabavie, adnak, dopis byŭ čamuści vydaleny z kanała viedamstva.
Supastaviŭšy fota i detali bijahrafii, my pierakanalisia, što havorka idzie pra ŭradženku Minska Inu Kardaš, jakaja naradziłasia ŭ 1991 hodzie.
Pavodle vypisak z bazy Belpol, Kardaš u 2012‑-2015 pracavała ŭ kampanijach «Junajted kompani» i «Maksbet». Z 2015 da 2018 hoda ŭ bazach FSAN pusta, u 2018—2019 supracoŭničała z «Tutbajmiedyja».
Paśla hetaha Kardaš pracavała jak žurnalist-fryłansierka na mnohija zamiežnyja miedyja, jakija časam šukali vykanaŭcaŭ na miescach.
Pry hetym jak apieratar joj časta akampanavaŭ Vasil Siamaška, jaki ŭvajšoŭ u historyju jak pravakatar, z dapamohaj jakoha KDB u 2018‑m aryštavaŭ ukrainskaha žurnalista Paŭła Šarojku.
Z 2020 hoda Kardaš stała aficyjna pracavać na telekanał «Ukraina» ŭ Biełarusi. Niekalki razoŭ jaje zatrymlivali pry aśviatleńni pratestaŭ. Naprykład, paśla zatrymańnia 16 žniŭnia 2020 hoda ŭ bazie «Biesparadki» źjaviŭsia nastupny zapis: «Praviedzieny zachady indyvidualnaj prafiłaktyki abo abvieščana vusnaje papiaredžańnie».
Imavierna, u kancy 2020 hoda Kardaš vyjechała ź Biełarusi.
Va Ukrainie jana pracavała na telekanał 112.ua, a paśla na miascovy «Interfaks».
«Naša Niva» — bastyjon biełaruščyny
PADTRYMAĆ
Sustreču Ryžankova ź Sikorskim paprasiŭ Minsk. Što kamanda Cichanoŭskaj abmiarkoŭvała z palakami da i paśla jaje11
Kamientary
BiełOruSSkaja žurnalistka INNA KARDAŠ . Heta ž staražytnyja našyja mahnaty . Kardašy . Ci vy nia viedali ?