Biełaruskaja vystava adkryłasia ŭ adnym z najbolšych muziejaŭ Kijeva
Vystava «Za našu i vašu svabodu» prachodzić u Nacyjanalnym muziei historyi Ukrainy ŭ Druhoj suśvietnaj vajnie.
19 vieraśnia ŭ Kijevie ŭ Nacyjanalnym muziei historyi Ukrainy ŭ Druhoj suśvietnaj vajnie, adkryłasia vystava «Za našu i vašu svabodu». Jana znajomić ź biełaruskaj nacyjanalnaj simvolikaj, vajskovaj formaj i ŭznaharodami biełaruskaha vyzvolnaha ruchu.
Adkryćcio adbyłosia ŭ Dzień biełaruskaha nacyjanalnaha ściaha i hierba, roŭna praz 35 hadoŭ paśla histaryčnych rašeńniaŭ Viarchoŭnaha Savieta, paviedamlaje ruch «Vola» ŭ svaim fejsbuku.
Ekspazicyja pravodzić naviedvalnikaŭ praz roznyja epochi biełaruskaj historyi: ad Połackaj dziaržavy i Vialikaha Kniastva Litoŭskaha, praź Biełaruskuju Narodnuju Respubliku, Słucki zbrojny čyn i biełaruskija vajskovyja farmavańni XX stahodździa, da sučasnaha zmahańnia za volnuju Biełaruś.
Na vystavie pradstaŭlenyja histaryčnyja i sučasnyja ściahi, prajekty dziaržaŭnaj simvoliki, nacyjanalnaj sistemy ŭznaharod, prajekt pašparta volnaj Biełarusi, a taksama simvolika i forma budučaha biełaruskaha vojska. Ekspazicyjnyja stendy dapaŭniajuć manitory ź infarmacyjnymi materyjałami. U aktavaj zali muzieja adbyłasia lekcyja pra historyju biełaruskich nacyjanalnych simvałaŭ.
Na adkryćci vystupili staršynia Hieraldyčnaj rady «Pahonia» i biełaruski dobraachvotnik Mikita Zabuha, a taksama siabra hetaj rady Aleś Čajčyc. Ukrainskija ŭdzielniki padziakavali biełaruskim dobraachvotnikam, jakija baroniać niezaležnaść Ukrainy. Pamiać zahinułych biełaruskich vajaroŭ ušanavali chvilinaj maŭčańnia.
Siarod haściej byli bajcy roty «Vola», čalcy ruchu «Vola» i ruchu «Kalinoŭcy». Vystavu taksama naviedaŭ Jarasłaŭ Čarnahor, pasoł pa asablivych daručeńniach Ministerstva zamiežnych spraŭ Ukrainy, jaki adkazvaje za suviazi ź biełaruskimi demakratyčnymi siłami.
Kamientary
Spačatku čamuści padumaŭ, što pakazvajuć toje, što jość, vykarystoŭvajecca zaraz.