Дзяржаўныя медыя не кажуць пра ахвяр выбуху ў Гомелі, каб не было негатыву ў дні УНС?
Як стала вядома «Нашай Ніве», асноўнай прычынай трагедыі на гэты момант лічыцца выбух няякаснага абсталявання пры мантажы навясных столяў. Але трэба разумець, што ў кватэры былі людзі. Што з імі — невядома.
За дзень да Усебеларускага народнага сходу, у самы разгар інфармацыйнай прэлюдыі да яго, у гомельскім дзесяціпавярховіку грымнуў выбух. Пад'езд выстаяў, але верхнія паверхі будуць дэмантаваць для замены пашкоджаных канструкцый. Сёння пара б ужо паведаміць пра прычыны неардынарнага здарэння, пра колькасць пацярпелых, пра наяўнасць загінулых. Але дзяржаўныя рэсурсы выварочваюцца ў іншасказаннях і эківоках, выходзячы за рамкі здаровага сэнсу.
17 снежня на 7‑м паверсе гомельскага дзесяціпавярховіка па вуліцы Косарава выбухнула «газапаветраная сумесь», у выніку чаго абрынулася некалькі перакрыццяў дома. Адна з бетонных пліт ледзь не вылецела на вуліцу.
У першыя гадзіны пасля здарэння сапраўды было не разабрацца, ці ёсць пад заваламі ахвяры і колькі іх. Але ў дзяржаўных СМІ загадзя пачалі прымяншаць масштаб падзеі: «ні ў стацыянары, ні да дактароў хуткай дапамогі ніхто не звяртаўся», пры гэтым адначасова: «адзінае, былі шпіталізаваныя тры чалавекі».
У вечаровых навінах на АНТ пра выбух сказалі толькі на шостай хвіліне. Вядучая паведаміла, што ідуць работы па пошуку пацярпелых і вызначэнні прычын здарэння. Ужо хутка суткі, як абнаўленняў па гэтай тэме няма.
Раніцай МНС апублікавала відэа з пашуковых работ з сабакамі, суправадзіўшы яго каментарыем «жывых людзей пад заваламі не знойдзена». А нежывых?
Не агучана і папярэдняя прычына здарэння. Пры гэтым па апублікаваных першых фота ясна, што эпіцэнтр выбуху быў не на кухні: гэта пад жылым пакоем праваліліся паверхі, і яго ж сцяну ледзь не выкінула на вуліцу.
Таксама па канструкцыях для выраўнівання столі на балконе пацярпелай кватэры можна зрабіць выснову, што ў ёй вёўся рамонт.
Як стала вядома «Нашай Ніве», асноўнай прычынай таго, што адбылося, на гэты момант разглядаецца выбух няякаснага абсталявання пры мантажы навясных столяў.
Але тады трэба разумець, што ў кватэры былі людзі. Напрыклад, аналагічны выпадак у 2019‑м годзе адбыўся ў Драгічыне. Тады ў рэанімацыі апынуліся двое рабочых і ўласніца кватэры.
Каментары