Выданне Financial Times апісала, як новае расійскае фарміраванне пад назвай «Рубікон» змяняе сітуацыю на фронце каля Пакроўска ў Данецкай вобласці. Гэта падраздзяленне было створана новым кіраўніцтвам Міністэрства абароны Расіі як прыклад сучаснай беспілотнай вайны і стала сур’ёзнай праблемай для ўкраінскіх войскаў.
Паводле інфармацыі FT, «Рубікон» фактычна пазбавіў украінцаў адной з галоўных іх пераваг — перавагі ў выкарыстанні дронаў. Украінскія вайскоўцы прызнаюць, што падраздзяленне дзейнічае вельмі прафесійна і эфектыўна, што дазваляе расійскім войскам хутка прасоўвацца ў бок Пакроўска.
Паводле экспертаў, «Рубікон» налічвае каля 5000 байцоў, мае значнае фінансаванне і дзейнічае інакш, чым традыцыйныя расійскія падраздзяленні. Замест прамых атак пяхоты яны знішчаюць украінскіх аператараў беспілотнікаў, перарываюць лагістыку і б’юць па мішэнях у тыле на глыбіні да 10 кіламетраў. Акрамя таго, «Рубікон» вучыць іншыя расійскія часці працы з дронамі, і пасля іх навучання ўзровень іх падрыхтоўкі заўважна расце.
Аналітыкі адзначаюць, што гэта сведчыць пра тое, што расійская армія стала больш гнуткай і ініцыятыўнай, пераняўшы шмат прыёмаў у саміх украінцаў. Разведгрупы «Рубікона» вылічваюць аператараў дронаў па радыёсігналах, антэнах і характэрных перамяшчэннях, пасля чаго перадаюць іх каардынаты авіяцыі або самі атакуюць.
Вялікую ролю ў гэтым адыгрывае радыёэлектронная барацьба (РЭБ) — барацьба за кантроль над электрамагнітным полем. Абодва бакі выкарыстоўваюць магутныя сістэмы РЭБ, але гэта робіць іх таксама бачнымі для праціўніка. У выніку адбываецца «гульня ў ката і мышку», дзе перавага залежыць ад тэхнікі і фізічных законаў, адзначае эксперт Том Уізінгтан.
Украінскія салдаты прызнаюць, што расіяне маюць значна больш людзей і рэсурсаў, таму могуць працаваць кругласутачна. «Да з’яўлення «Рубікона» тут было амаль спакойна, цяпер — зусім іншая сітуацыя», — кажа адзін з байцоў.
Financial Times робіць выснову, што раней беспілотнікі давалі Украіне перавагу, але Расія навучылася адаптавацца і пабудавала сваю ўласную сістэму. Цяпер Кіеву патрэбны адзіны, добра скаардынаваны план супраць «Рубікона». Украінскія брыгады ўжо пачалі ствараць уласныя групы для «палявання» на расійскіх аператараў дронаў, але падрабязнасцяў пакуль не раскрываюць.
Цяпер чытаюць
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам29
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам
«Лукашэнка павінен панесці адказнасць за саўдзел у расійскай агрэсіі». Міністр замежных спраў Украіны расказаў пра новую палітыку ў дачыненні да Беларусі2424
Каментары