«Беларусіянізм — гучыць прыгожа». Вольга Лойка прапанавала сваю нацыянальную ідэю
У новым выпуску аналітычнага ТОКу эканамічная аглядальніца Вальга Лойка паразважала аб тым, якая ідэя можа аб'яднаць беларусаў замежжа з тымі, хто жыве ў Беларусі.
Нядаўна Лукашэнка зноў запатрабаваў ад чыноўнікаў выпрацаваць нацыянальную ідэю.
Вольга Лойка заўважае, што «ў Лукашэнкі складана з абстрактным мысленнем, яму складана самому сфармуляваць, чаго ён хоча, прыкладны кірунак, які ён мог бы бачыць у якасці нацыянальнай ідэі» і дадае, што шмат якія нацыянальныя ідэі вельмі простыя. Самыя вядомыя — гэта амерыканская мара і ізраільскі сіянізм.
Лойка прапаноўвае: «Я б, дапусцім, на месцы нас як беларусаў за межамі краіны таксама сфармулявала б нейкую нацыянальную ідэю, які-небудзь умоўны такі беларусіянізм з цалкам канкрэтным напаўненнем. Гэта і адзіная дзяржава для ўсіх беларусаў як мэта, мара, і салідарнасць як наша фішка, якая сапраўды ўвайшла ўжо ў аналы, і як салідарнасць дыяспары з вялікай зямлёй».
У якасці апошняга аглядальніца прыводзіць ініцыятыву «Мальдзіс» па выкупе і перадачы культурных каштоўнасцей Беларусі.
Яшчэ адным праектам маглі б стаць летнія матэматычныя лагеры для дзяцей, асабліва для тых, хто апынуўся ў складанай жыццёвай сітуацыі або паходзіць з няпоўных сем’яў. Фінансавацца такія летнікі могуць праз спецыяльны фонд, створаны IT-кампаніямі. Па словах Лойкі, ужо цяпер такая ідэя абмяркоўваецца сярод заможных беларусаў.
«Мы вывезем 10 дзяцей за лета, яны пракачаюць свае матэматычныя скілы, павучаць мову, адпачнуць, безумоўна, вернуцца ў Беларусь, і ў гэтым нічога дрэннага не будзе. Я не думаю, што дзяржава была б супраць», — даводзіць экспертка.
Яшчэ адна ідэя — выдзяляць стыпендыі для навучання ў найлепшых сусветных ВНУ. Тым чыноўнікам, каму гэта можа не спадабацца, Лойка нагадвае:
«Нават Міхаіл Гуцэрыеў пра гэта гаварыў. Хлопцы, каб не дапусціць тэхналагічнага адставання, вельмі важна, каб маладыя расіяне (як і маладыя беларусы) былі актыўнымі ў гэтым навуковым, навучальным асяроддзі.
Яшчэ адзін напрамак — гэта медыцынская дапамога беларускім дзецям: «Давайце, дыяспара возьме нейкую частку на сябе — «мы там вам гатовы дапамагчы нейкім аб'ёмам збору, нейкім сваім унёскам».
«Гэта для ўсіх беларусаў, для любых беларусаў. І ў гэтым была б цалкам сабе нацыянальная ідэя. Досыць сімпатычная прынамсі. Па меншай меры, у ёй было б бачна нейкае напаўненне», — даводзіць эканамічная аглядальніца і дадае:
«Беларусіянізм — гучыць прыгожа. Не для Лукашэнкі, канечне».
Цяпер чытаюць
«Мы не ведалі Сяргея Ціханоўскага да сённяшняй прэс-канферэнцыі»12
Каментары