Стала вядома імя трэцяга чалавека, абвешчанага Інтэрпалам у вышук праз пасадку ў Мінску самалёта Ryanair
Андрэй А., прозвішча якога раней не называлі, аказаўся магчымым начальнікам 9-га галоўнага ўпраўлення КДБ, даведаўся «Белсат».
У верасні 2024 года суд у Варшаве завочна арыштаваў трох беларусаў па справе аб тэрарызме ў сувязі з захопам самалёта Ryanair у 2021 годзе. Паведамлялася, што гэта начальнік Беларускай аэранавігацыі Леанід Чуро, начальнік змены кантролю палётаў Яўген Цыганоў і афіцэр КДБ Андрэй А., прозвішча якога не называлі.
У студзені 2025 года Інтэрпал выдаў «чырвонае апавяшчэнне» на іхны вышук. Але прозвішча афіцэра КДБ Андрэя А. М. і тады не назвалі — толькі першую літару.
Цяпер прэс-сакратар Нацыянальнай пракуратуры Польшчы паведаміў «Белсату», што трэці чалавек у вышуку — начальнік 9-га галоўнага ўпраўлення Камітэту дзяржаўнай бяспекі Беларусі Андрэй Анатолевіч Мыцько.
У пракуратуры таксама расказалі, што арышту гэтых трох асобаў будуць дамагацца праз Інтэрпал і еўрапейскія ордары на арышт, а звяртацца ў Беларусь праз механізмы міжнароднай супрацы не збіраюцца.
Пра Андрэя Мыцько вядома мала. У 2008 годзе яго называлі намеснікам начальніка аднаго з аддзелаў КДБ. Адметна, што справа тады была звязаная з карупцыяй на будаўніцтве, у тым ліку Нацыянальнага аэрапорта «Мінск»: замаўлялі амерыканскія кампазітныя алюмініевыя панэлі для фасаду, а паставілі няякасныя беларускія.
У «Воку Змагара» — праекце «Кіберпартызанаў» па пошуку сілавікоў — пазначана, што Андрэй Анатольевіч Мыцько працуе ў КДБ, нарадзіўся 11 жніўня 1973 года. Больш пра яго звестак няма.
У арганізацыі Belpol «Белсату» пацвердзілі, што такі чалавек сапраўды працуе ў КДБ (в/ч 10091) і мае такое фота, як у базе «Кіберпартызанаў». Але якая ў яго пасада цяпер, дакладна невядома. У 2006-м ён быў намеснікам начальніка аднаго з пададдзелаў па пытаннях эканомікі КДБ, а на 2021 год мог зрабіцца ўжо і кіраўніком 9-га ўпраўлення, дадаюць у Belpol.
Дзявятае ўпраўленне — гэта ўпраўленне эканамічнай бяспекі, расказалі ў Belpol. Дэпартамент авіяцыі — гэта «іхні аб’ект», кажуць у аб’яднанні.
Нагадаем, што самалёт Ryanair, які ляцеў з Афін у Вільню, 23 мая 2021 года быў прымусова пасаджаны ў Мінску нібыта з-за паведамлення аб выбуховай прыладзе на борце. Пасля пасадкі былі затрыманыя блогер Раман Пратасевіч і ягоная сяброўка Сафія Сапега. Пазней яны былі асуджаныя ў Беларусі на вялікія тэрміны зняволення, а пасля памілаваныя за супрацу са следствам.
Пасля гэтага інцыдэнту Еўрасаюз забараніў беларускім авіякампаніям ажыццяўляць рэйсы ў аэрапорты супольнасці і над яго тэрыторыяй, а таксама парэкамендаваў еўрапейскім перавозчыкам адмовіцца ад палётаў у паветранай прасторы Беларусі.
Міжнародная арганізацыя грамадзянскай авіяцыі (ICAO) у сваім дакладзе прыйшла да высновы, што звесткі аб наяўнасці бомбы на борце самалёта былі загадзя лжывымі.
Каментары