Stała viadoma imia treciaha čałavieka, abvieščanaha Interpałam u vyšuk praz pasadku ŭ Minsku samalota Ryanair

U vieraśni 2024 hoda sud u Varšavie zavočna aryštavaŭ troch biełarusaŭ pa spravie ab teraryźmie ŭ suviazi z zachopam samalota Ryanair u 2021 hodzie. Paviedamlałasia, što heta načalnik Biełaruskaj aeranavihacyi Leanid Čuro, načalnik źmieny kantrolu palotaŭ Jaŭhien Cyhanoŭ i aficer KDB Andrej A., proźvišča jakoha nie nazyvali.

U studzieni 2025 hoda Interpał vydaŭ «čyrvonaje apaviaščeńnie» na ichny vyšuk. Ale proźvišča aficera KDB Andreja A. M. i tady nie nazvali — tolki pieršuju litaru.

Ciapier pres-sakratar Nacyjanalnaj prakuratury Polščy paviedamiŭ «Biełsatu», što treci čałaviek u vyšuku — načalnik 9-ha hałoŭnaha ŭpraŭleńnia Kamitetu dziaržaŭnaj biaśpieki Biełarusi Andrej Anatolevič Myćko.

U prakuratury taksama raskazali, što aryštu hetych troch asobaŭ buduć damahacca praź Interpał i jeŭrapiejskija ordary na aryšt, a źviartacca ŭ Biełaruś praź miechanizmy mižnarodnaj supracy nie źbirajucca.

Pra Andreja Myćko viadoma mała. U 2008 hodzie jaho nazyvali namieśnikam načalnika adnaho z adździełaŭ KDB. Admietna, što sprava tady była źviazanaja z karupcyjaj na budaŭnictvie, u tym liku Nacyjanalnaha aeraporta «Minsk»: zamaŭlali amierykanskija kampazitnyja aluminijevyja paneli dla fasadu, a pastavili niajakasnyja biełaruskija.

U «Voku Zmahara» — prajekcie «Kibierpartyzanaŭ» pa pošuku siłavikoŭ — paznačana, što Andrej Anatoljevič Myćko pracuje ŭ KDB, naradziŭsia 11 žniŭnia 1973 hoda. Bolš pra jaho źviestak niama.

U arhanizacyi Belpol «Biełsatu» paćvierdzili, što taki čałaviek sapraŭdy pracuje ŭ KDB (v/č 10091) i maje takoje fota, jak u bazie «Kibierpartyzanaŭ». Ale jakaja ŭ jaho pasada ciapier, dakładna nieviadoma. U 2006-m jon byŭ namieśnikam načalnika adnaho z padadździełaŭ pa pytańniach ekanomiki KDB, a na 2021 hod moh zrabicca ŭžo i kiraŭnikom 9-ha ŭpraŭleńnia, dadajuć u Belpol.

Dziaviataje ŭpraŭleńnie — heta ŭpraŭleńnie ekanamičnaj biaśpieki, raskazali ŭ Belpol. Departamient avijacyi — heta «ichni abjekt», kažuć u abjadnańni.

Nahadajem, što samalot Ryanair, jaki lacieŭ z Afin u Vilniu, 23 maja 2021 hoda byŭ prymusova pasadžany ŭ Minsku nibyta z-za paviedamleńnia ab vybuchovaj pryładzie na borcie. Paśla pasadki byli zatrymanyja błohier Raman Pratasievič i jahonaja siabroŭka Safija Sapieha. Paźniej jany byli asudžanyja ŭ Biełarusi na vialikija terminy źniavoleńnia, a paśla pamiłavanyja za supracu sa śledstvam.

Paśla hetaha incydentu Jeŭrasajuz zabaraniŭ biełaruskim avijakampanijam ažyćciaŭlać rejsy ŭ aeraporty supolnaści i nad jaho terytoryjaj, a taksama parekamiendavaŭ jeŭrapiejskim pieravozčykam admovicca ad palotaŭ u pavietranaj prastory Biełarusi.

Mižnarodnaja arhanizacyja hramadzianskaj avijacyi (ICAO) u svaim dakładzie pryjšła da vysnovy, što źviestki ab najaŭnaści bomby na borcie samalota byli zahadzia łžyvymi.

• 21
• 2
• 4
• 1
• 1
• 0
• 0
• 1