Łukašenka raskazaŭ, čamu pamiłavaŭ Pratasieviča i Sapiehu, i namiaknuŭ, kaho ličyć najbolš niebiaśpiečnym
Padčas pajezdki ŭ Minskuju vobłaść Alaksandr Łukašenka zakranuŭ pytańnie, čamu pryniaŭ rašeńnie ab pamiłavańni Ramana Pratasieviča.
«Hety chłopiec zrabiŭ usio, što abiacaŭ. Heta nie tamu, kab nie trapić u turmu. Jon pryznaŭsia, što niapravilna pastupiŭ. Na froncie jon nie byŭ, nikoha nie zabivaŭ», — adkazaŭ Łukašenka na pytańnie žurnalistaŭ.
Situacyja z Safijaj Sapiehaj, pavodle Łukašenki, była inšaj. Jana hramadzianka Rasii, i jašče da suda jaje nibyta płanavali vydać rasijskim pravaachoŭnym orhanam. Ale «praces zaciahnuŭsia da niemahčymaści».
«Jak niekatoryja havorać, zakachałasia. I jana ŭlezła ŭ heta. Tak, vinavataja. Ale heta nie naša hramadzianka, u nas svaich chapaje. Zabirali niedzie paŭhoda — nie zabrali. Ciahanina nie z našaha boku… A maralna: zakachałasia ŭ chłopca, paśla jaho pamiłavali i adpuścili, a dziaŭčynka budzie tam siadzieć?» — skazaŭ Łukašenka, jaki admoviŭ Sapiezie ŭ pamiłavańni.
Kali ŭ Biełaruś prybyŭ hubiernatar Prymorskaha kraju Aleh Kažamiaka, było vyrašana vyzvalić Safiju Sapiehu, kab jana zmahła viarnucca na radzimu, skazaŭ Łukašenka.
Jon taksama adkazaŭ na paproki pułaŭskich žurnalistaŭ za toje, što Sapiehu pamiłavali.
«Ja vas čuju. Ličusia z vašym mierkavańniem. Ale, paviercie, vy nie ŭsio viedajecie. Ja nikoli nie byŭ zdradnikam i da kanca budu iści.
Hetych «łachušak» i inšych — tam pamiłavańnia ŭžo nie było b. Tamu što jany stolki škody krainie prynieśli. I heta jany vinavatyja bolš za ŭsio. My ž bačym u detalach, jak jany ciahnuć našych ašalełych i amataraŭ krychu padzarabić, vypić, prakałocca i hetak dalej. Kažuć — połk Kalinoŭskaha… Tam mienš za dźvieście čałaviek, užo, moža, i sto siońnia: zahinuła vielmi šmat. Jany ŭ šoku: «Chaču viarnucca. Ja ŭ dyktatury budu žyć». A nielha viarnucca: nie puskajuć, zahradatrady zzadu», — havoryć Łukašenka.
«Hetyja arhanizatary kštałtu «łachušak-cichušak» hrošy miljonami atrymlivajuć — my heta taksama bačym. Jany hrošy prysvojvajuć, a hetych durniaŭ — kaho na front, kaho ŭ Biełaruś, kab dyviersii rabili, — pierakidvajuć. Chto bolš za ŭsio vinavaty? Hetyja miarzotniki. Ale hetym prabačeńnia nie budzie, tamu što ŭ ich kroŭ na rukach. Za heta jany buduć adkazvać», — skazaŭ jon.
Safija Sapieha razam z Ramanam Pratasievičam byli zatrymanyja 23 maja ŭ vyniku prymusovaj pasadki ŭ Minsku samalota Ryanair rejsam Afiny — Vilnia.
6 maja 2022 hoda Sapiehu asudzili da šaści hadoŭ kałonii. Sud pryznaŭ jaje vinavataj u raspalvańni sacyjalnaj varožaści, źlivie danych siłavikoŭ (sprava «Čornaj knihi Biełarusi»).
Raman Pratasievič byŭ asudžany 3 maja 2023 hoda na 8 hadoŭ kałonii ŭzmocnienaha režymu pa spravie Nexta. 22 maja jon byŭ pamiłavany.
Pra pamiłavańnie Sapiehi stała viadoma 7 červienia.
«Ja nie chaču adpuskać žyćcio». U piśmieńnicy Śviatłany Kurs rak na poźniaj stadyi10
Kamientary
nu j
dzie jano?