Малодшы сын Сахашчыка абвешчаны зніклым без вестак. Выглядае, ён ваяваў за Расію

У Расіі абвясцілі зніклым без вестак 23‑гадовага ўраджэнца Брэста Віктара Валер’евіча Сахашчыка. У тым, што беларусаў дадаюць у базу вышуку, няма нічога дзіўнага, звычайна гэта адбываецца па запыце беларускіх сілавікоў у сувязі з нейкай крымінальнай справай.

Але сітуацыя з Віктарам Сахашчыкам іншая. Па-першае, яго дадалі ў базу зніклых па ініцыятыве Расіі, а не Беларусі. Па-другое, у якасці тэлефонных нумароў, па якіх можна паведаміць звесткі пра чалавека, пазначаны кантакт Кантэміраўскай танкавай дывізіі.

У цяперашніх рэаліях спалучэнне гэтых фактараў з высокай доляй імавернасці сведчыць пра тое, што гаворка ідзе пра беларускага наёмніка, які загінуў на вайне ва Украіне, але яго цела не змаглі дастаць.

«Віктар жыў са мной, напэўна, восем апошніх гадоў, але паўтара года таму да яго прыехала маці, з якой мы ў разводзе. Ён ужо жыў асобна на той момант. Яна пабыла з Віктарам тыдзень — і ўгаварыла яго вярнуцца ў Беларусь. Я на гэта паўплываць не мог, ён дарослы чалавек. Кантакт з ім мы пасля гэтага не падтрымлівалі.

Я не магу сказаць дакладна, дзе ён быў у апошні час, мне ўсё гэта вельмі балюча і цяжка. Мне цяжка паверыць, што ён мог служыць у расійскай арміі. Калі ён быў тут, прытрымліваўся тых жа жыццёвых каштоўнасцей, што і я, і быў гатовы ехаць ваяваць за Украіну», — расказаў «Нашай Ніве» Валер Сахашчык.

Віктар Сахашчык нарадзіўся 26 лютага 2003 года. Ён малодшы сын Валерыя Сахашчыка, бізнэсмена і былога прадстаўніка Аб’яднанага пераходнага кабінета па абароне і нацыянальнай бяспецы (2022-2024). Сахашчык далучыўся да Святланы Ціханоўскай пасля нападу Расіі на Украіну, які ён асудзіў у сваім звароце да беларускіх і расійскіх вайскоўцаў. Праз два гады ён адышоў ад палітыкі.

Чытайце таксама: Хто такі Валерый Сахашчык, які ўзначаліў сілавы блок у кабінеце Ціханоўскай

Віктар вучыўся ў Брэсце ў школе №14 і гімназіі №6. На яго старонцы «Укантакце» пазначана, што ў 2018‑2022 ён займаўся ў архітэктурна-будаўнічым тэхнікуме ў Варшаве.

Павялічыць

Валерый Сахашчык расказваў у інтэрв’ю, што ў яго пяцёра дзяцей. Два старэйшыя сыны (гаворка пра Аляксандра і Алега) працавалі ў Польшчы ў адным бізнэсе з ім. А вось малодшы сын — гаворка якраз пра Віктара — у той час служыў у польскай арміі.

«Ён знайшоў сабе вельмі цікавую прафесію — вадалаз-выратавальнік. Ёсць шмат спецыяльнасцяў, якія ён асвоіў. І яму вельмі падабаецца калектыў і работа. На маё пытанне, чаму флот, ён адказаў: «Баця, ну ты ж таксама дэсантнікам першым у нашым родзе быў. Ну а я гэта паспрабую», — распавядаў Сахашчык у «ТОКу».

Тэлеграм-акаўнт Віктара Сахашчыка быў падпісаны на каналы па пошуку працы ў Маскве і Пецярбургу.

• 3
• 1
• 11
• 69
• 8
• 11
• 7
• 0