Абанент: Зайшоў у інтэрнэт у роўмінгу на пару хвілін — на балансе мінус 10 000 рублёў!
Паводле слоў мужчыны, ён шмат гадоў карыстаўся паслугай «Unlim за мяжой», піша Onliner.by.
«Гэты тарыф пазіцыянуецца як паслуга, што дае безлімітны інтэрнэт у пэўных сетках-партнёрах за мяжой без дадатковых спісаў, акрамя кошту самой паслугі. Больш за тое, ў апісанні гаворыцца, што гэтая паслуга — «Без непрадбачаных выдаткаў» і што ў выпадку падключэння да сеткі, якая не з’яўляецца партнёрскай, інтэрнэт аўтаматычна блакуецца», — кажа абанент.
І працягвае: «Акрамя таго, у раздзеле «Важна ведаць» пазначана, што паслуга не дзейнічае ў Ганконгу, Макаа, Тайвані і Палесціне — і ў гэтых выпадках дзейнічае базавая тарыфікацыя інтэрнэту (Дубай не згадваецца)».
Што менавіта адбылося?
Малады чалавек адказвае: нядаўна (8 сакавіка) у яго быў транзітны рэйс у Дубаі. «Мне трэба было ўсяго толькі зайсці ў сетку на некалькі хвілін, каб заказаць кветкі дзяўчыне. Як жа я здзівіўся, калі пасля вяртання пабачыў баланс — мінус 10 000 рублёў!» — сцвярджае чытач, прыкладаючы скрыншот з мабільнага дадатку.
Паводле яго слоў, падчас візіту ў офіс МТС яму адказалі, што «Unlim за мяжой» у Дубаі не працуе, і, адпаведна, дзейнічаюць стандартныя (вельмі высокія) тарыфы.
Абанент робіць акцэнт: «На афіцыйным сайце МТС пазначана: калі падключаешся да сеткі, якая не з’яўляецца партнёрам, то доступ у інтэрнэт блакуецца. Ніякага блакавання не адбылося. Таксама ў СМС-паведамленні, якое я атрымаў па прыездзе ў Дубай, не было ніякай інфармацыі і/ці папярэджання».
Разам з тым малады чалавек не адмаўляе, што мог не да канца азнаёміцца з умовамі паслугі «Unlim за мяжой», — згодна з інфармацыяй на сайце МТС, ААЭ не ўваходзіць у спіс краін, у якіх яна аказваецца.
У размове з чытачом таксама высветлілася: пасля ён напісаў заяву ў МТС з просьбай перагледзець суму, і ў выніку, паводле яго слоў, аплаціў [перагледжаны] доўг у памеры 1500 рублёў.
«Я вопытны падарожнік, які шмат разоў чытаў пра падобныя сітуацыі ў іншых людзей, падключыў усе неабходныя налады — і ўсё адно апынуўся ў даўгах», — падсумаваў суразмоўца.
Яшчэ два выпадкі з «мінусамі» ад 3,4 да 6,6 тысячы рублёў
У рэдакцыю напісалі яшчэ два абаненты — на гэты раз аператара А1 — з даволі буйнымі «мінусамі» на рахунку.
Першы выпадак адбыўся з чытачом, які, паводле яго аповеду, у студзені сёлета накіроўваўся ў Індыю, падключыўшы паслугу «Роўмінг Топ 1 ГБ» на тэрыторыі Расіі. Але па прылёце ў краіну прызначэння (Індыю) яму «прыйшло паведамленне, што запазычанасць складае 3451 рубель».
Важна: абанент «часткова прызнае сваю віну, што павінен быў лепш вывучыць пытанне пра роўмінг» — Індыя, зыходзячы з інфармацыі на афіцыйным сайце А1, не ўваходзіць у спіс краін, у якіх дзейнічае паслуга.
Разам з тым пазней абанент, паводле яго слоў, звярнуўся ў кампанію з просьбай перагледзець «доўг», пасля чаго «супрацоўнік кампаніі А1 прапанаваў аплаціць 10%, а астатняе — у растэрміноўку на дзевяць месяцаў». Аднак чытач сцвярджае, што з’яўляецца шматдзетным бацькам, які выхоўвае дзіця-інваліда, і ў дадзены момант не мае магчымасці аплачваць суму.
Другі выпадак адбыўся з чытачом, «які паляцеў у Тайланд на зімоўку». Абанент, які прадставіўся спартсменам-блогерам, кажа, што «па прылёце скарыстаўся роўмінгам для навігатара і Telegram без падключэння тарыфаў». «Да канца дня выпадкова заўважыў, што ўтварыўся доўг у 3000 рублёў, пасля чаго адразу адключыў інтэрнэт. Па прыездзе на вілу выявіў, што кожныя паўгадзіны сума доўгу расце на 500—700 рублёў, і такім чынам налічылася 6600 рублёў запазычанасці», — заключае абанент.
У размове мужчына таксама дадаў: «Уключыў інтэрнэт-роўмінг па прылёце на месца, без загадзя актываванай паслугі». (Гаворка пра роўмінг-пакет інтэрнэт-трафіку.) Абанент гэтага не адмаўляе, але сцвярджае: на наступны дзень пасля звароту ў падтрымку яму «прапанавалі знізіць суму да 1300 рублёў, на што ён і згадзіўся».
Цяпер чытаюць
«Быў галодны, як з Асвенціма, не еў ні мяса, ні гародніны». Што вядома пра смерць бабруйскага журналіста, на якога завялі крымінальную справу ў Польшчы1616
Каментары