Музейны квартал у Мінску плануюць адкрыць для наведвальнікаў у 2028 годзе. У новым музейным комплексе будуць улічаныя сучасныя стандарты інклюзіўнасці, каб прастора была зручнай у тым ліку для людзей з абмежаванымі магчымасцямі, піша агенцтва «Мінск-Навіны».
Як паведаміла генеральная дырэктарка Нацыянальнага мастацкага музея Ірына Мацяш, дзякуючы мадэрнізацыі галоўны мастацкі музей краіны атрымае дадатковыя выставачныя плошчы, лекцыйную залу і новыя фондасховішчы.
Пашырэнне музея стала неабходным у тым ліку праз хуткі рост яго калекцыі. Толькі за апошні год музейныя фонды папоўніліся 5600 творамі беларускага мастацтва. Цяпер агульная колькасць экспанатаў у калекцыі перавышае 40 тысяч.
Ірына Мацяш адзначыла, што ў абноўленай прасторы будуць створаныя ўмовы, якія адпавядаюць сучасным патрабаванням інклюзіўнасці. Паводле яе слоў, разлічваюць, што музейны квартал стане культурным цэнтрам, дзе жыхары Мінска і госці сталіцы змогуць камфортна праводзіць цэлы дзень.
Каментары