Але пасля выбараў у ЗША канцлер Германіі ўсё ж вырашыў патэлефанаваць у Крэмль.
Некалькі месяцаў таму Олаф Шольц раіўся з Уладзімірам Зяленскім наконт званка Уладзіміру Пуціну. Тады прэзідэнт Украіны адгаварыў канцлера Германіі ад гэтага кроку.
Пра гэта ў твітары распавёў экс-міністр замежных спраў Украіны Дзмітрый Кулеба.
«Некалькі месяцаў таму канцлер Шольц спытаў у прэзідэнта Зяленскага, ці будзе дарэчным патэлефанаваць Пуціну. Зяленскі выступіў супраць гэтай ідэі, і Шольц устрымаўся. Аднак пасля выбараў у ЗША Шольц вырашыў, што час настаў, і патэлефанаваў. Зяленскі публічна, але мякка раскрытыкаваў яго за гэта», — піша Кулеба.
На яго думку, крок Шольца стаўся правальным.
«Падаецца, гэты званок не прынёс нічога істотнага для паляпшэння іміджу Шольца сярод нямецкіх выбарцаў, якія сімпатызуюць Расіі. Пуцін вырваўся з еўрапейскай ізаляцыі, і Германія праклала яму шлях. Адразу пасля Венгрыі.
Давер паміж Зяленскім і Шольцам падарваны. Варта памятаць, што Германія з'яўляецца другім па велічыні пастаўшчыком ваеннай дапамогі Украіне пасля ЗША.
З цяжкасцю заваяваная рэпутацыя Германіі сярод украінцаў сур'ёзна пацярпела. А Пуцін прадэманстраваў свету, што яго стратэгія працуе — Захад урэшце схіліць галаву пад выглядам заклікаў да яго спыніць вайну, чаго ён рабіць не збіраецца», — лічыць Кулеба.
Ён дадаў, што яму цяжка зразумець, наколькі званок быў апраўданы.
«Па-англійску гэта называецца «фальстарт». Які эквівалентны тэрмін на нямецкай мове?» — ставіць пытанне Кулеба.
Шольц сазваніўся з Пуціным 15 лістапада. Канцлер Германіі заклікаў Расію да перамоваў з Украінай «з мэтай устанаўлення справядлівага і трывалага міру». А таксама адзначыў, што Германія будзе і далей падтрымліваць Украіну «ў яе абарончай барацьбе супраць расійскай агрэсіі», пакуль гэта неабходна.
Па версіі Крамля, Пуцін заявіў, што адкрыты да перамоў, але на сваіх умовах.
Цяпер чытаюць
Трамп запрасіў Лукашэнку ўвайсці ў Раду міру па Газе38
Каментары