Прэм’ер-міністр Літвы Міндаўгас Сінкявічус заявіў, што беспілотнік, які заляцеў на тэрыторыю краіны 18 кастрычніка, прыляцеў з Польшчы і быў абсталяваны баявым зарадам. Паводле яго слоў, у гэтым няма сумневаў. Дрон быў украінскім, піша Delfi.lt.
Інцыдэнт адбыўся ў нядзелю. У Панявежскім і Шаўляйскім паветах абвясцілі чырвоны ўзровень паветранай трывогі. Літоўскія вайскоўцы паведамілі, што абломкі беспілотніка знайшлі ў вёсцы Юаджоніс. Яны пашкодзілі аўтамабіль, які праязджаў побач, але людзі ў машыне не пацярпелі.
Сінкявічус патлумачыў, што гэты выпадак адрозніваўся ад папярэдніх выпадкаў выяўлення дронаў у Літве, бо беспілотнік перасёк мяжу з Польшчай, якая ўваходзіць у Шэнгенскую зону. Знішчальнікі ўзляцелі і адсочвалі аб’ект, але праз неспрыяльныя ўмовы надвор’я не змаглі ўбачыць яго візуальна. Прычыны падзення і выбуху дрона высвятляюцца: следчыя правяраюць, ці сутыкнуўся ён з зямлёй або дрэвам.
Таксама на гэтым пасяджэнні Камітэта нацыянальнай бяспекі Літвы абмяркоўвалі начную спробу падпаліць абсталяванне Starlink. Як паведаміў прэм’ер-міністр Літвы, інцыдэнт адбыўся на тэрыторыі кампаніі Delska Lithuania ў Вільні, у раёне Верхнія Панары. Там захоўвалася абсталяванне Starlink.
Па словах Сінкявічуса, зламыснікі выкарысталі запальную сумесь і «кактэйлі Молатава», каб учыніць пажар. Агонь своечасова заўважыў ахоўнік, які пачаў яго тушыць і выклікаў пажарнікаў. Антэны не загарэліся, толькі крыху абгарэў блок кіравання. Да прыезду ратавальнікаў іх дапамога ўжо не спатрэбілася. Расследаванне працягваецца, падазраваныя пакуль не вызначаныя, іх актыўна шукаюць.
Сінкявічус і кіраўнік Нацыянальнага цэнтра кіравання крызісамі Вілмантас Віткаўскас звязалі гэтыя падзеі з гібрыднай дзейнасцю Расіі ў рэгіёне, накіраванай, паводле іх ацэнкі, на тое, каб паўплываць на поспех украінскіх аперацый. Прэм’ер назваў падпал дыверсіяй.
Пасля інцыдэнту ўлады ўзмацнілі ахову аб’ектаў крытычнай інфраструктуры. Паводле Сінкявічуса, асаблівыя меры бяспекі цяпер дзейнічаюць на 15 такіх аб’ектах. Таксама абмяркоўвалася, як палепшыць інфармаванне і абарону кампаній, звязаных з абароннай прамысловасцю.
Прэм’ер дадаў, што прадстаўнікоў Delska Lithuania яшчэ ў пятніцу папярэдзілі пра неабходнасць узмацніць ахову. Гэта адбылося незадоўга да спробы падпалу.
Цяпер чытаюць
23‑гадовага афіцэра брыгады спецназа асудзілі на 19 гадоў за «здраду дзяржаве»17
23‑гадовага афіцэра брыгады спецназа асудзілі на 19 гадоў за «здраду дзяржаве»
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў88
Каментары