Беларусы хавалі тысячы незадэклараваных на мяжы даляраў у пачках з сурвэткамі
Сямейная пара спрабавала правезці праз беларуска-польскую мяжу незадэклараваныя грошы, схаваўшы частку наяўных у пачках з сурвэткамі. Парушэнне выявілі гродзенскія мытнікі падчас агляду асабістых рэчаў пасажыраў, піша прэс-служба Дзяржаўнага мытнага камітэта.
Мужчына і жанчына ехалі рэйсавым аўтобусам з Польшчы праз пункт пропуску «Бераставіца». Яны ведалі, што дэклараваць неабходна наяўныя грошы на суму, якая перавышае эквівалент 10 тысяч долараў ЗША. Падчас вуснага апытання кожны з іх заявіў, што мае пры сабе крыху меншую суму. Для перасячэння мяжы пара абрала зялёны калідор.
Падчас мытнага кантролю ў сумцы жанчыны, аднак, знайшлі яшчэ 3,5 тысячы даляраў, а ў сумцы мужчыны — 2,4 тысячы даляраў. Грошы былі загорнутыя ў сурвэткі і спакаваныя ў пакеты.
Гродзенская рэгіянальная мытня пачала ў дачыненні да абодвух грамадзян адміністрацыйныя працэсы паводле часткі 2 артыкула 15.1 Кодэкса аб адміністрацыйных правапарушэннях Беларусі. Схаваныя грошы канфіскавалі да рашэння суда.
У мытні нагадалі, што пры перамяшчэнні праз мяжу наяўных грошай на суму звыш 10 тысяч даляраў ЗША ў эквіваленце неабходна праходзіць праз чырвоны калідор і запаўняць пасажырскую мытную дэкларацыю на ўсю суму наяўных сродкаў.
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра2828
Каментары