Літоўскаму сябру Ксеніі Лебедзевай далі дзевяць гадоў турмы за шпіянаж на карысць беларускага КДБ
Суд у Вільні прызнаў яго вінаватым у шпіянажы на карысць КДБ Беларусі, піша Радыё Свабода.
20 верасня Віленскі акруговы суд вынес вырак юрысту Мантасу Данелюсу, які з 2022 года збіраў інфармацыю для беларускіх спецслужбаў, у асноўным пра актывістаў, якія жывуць у Літве, і перадаваў зьвесткі прапагандыстцы Ксеніі Лебедзевай.
Мантаса Данелюса затрымалі ў Літве 28 верасьня 2022 году пры спробе ўцячы ў Беларусь.
Данелюса прызналі вінаватым не толькі ў шпіянажы, а і ў спробах уплываць на сведак — калі яго вызвалілі з-пад арышту да суду, ён напісаў аднаму зь іх, што «вострыць сякеру». Пасьля чаго літоўца зноў арыштавалі.
Абвінавачаньне прыйшло да высновы, што беларуская прапагандыстка Ксенія Лебедзева інструктавала Данелюса, якую інфармацыю збіраць: яе найбольш цікавілі беларускія арганізацыі ў Літве, людзі, якія ўцякалі зь Беларусі ад пераследу і якія дапамагалі ім уцякаць, шляхі іх эвакуацыі, вучэнні добраахвотнікаў палка імя Каліноўскага, іх узбраенне і ланцугі паставак.
Данелюс змог увайсьці ў давер да беларускіх арганізацыяў і прапаноўваў ім юрыдычную дапамогу, але ягоныя пытаньні пачалі выклікаць падазрэнні.
Раней у апошнім слове літовец папрасіў суд апраўдаць яго і звярнуў увагу пракурора на паказанні некаторых сьведак, якія ён назваў лжывымі. Данелюс таксама заявіў, што не пагражаў сведку, а выказаў незадавальненне пазыцыяй беларускіх актывістаў.
Пракурор запатрабаваў асудзіць Данелюса на 11 гадоў пазбаўленьня волі. Судовы разгляд справы адбываўся за зачыненымі дзьвярыма, але прысуд быў адкрыты.
Раней Данелюса судзілі па падазрэнні ў фальсіфікацыі дакументаў.
Цяпер чытаюць
«Хаваеш свой жах, бо гэта шкілет са скурай». Святлана Ціханоўская прызналася, ці пазнала Сяргея праз пяць гадоў1
Каментары