Квіткоў на аўтобусы з Беларусі ў Літву не дакупіцца. Колькасць рэйсаў скарачаецца, цэны растуць
Калі на выездзе з Беларусі ў польскім кірунку — велізарныя чэргі, то на літоўскім — дэфіцыт квіткоў.
Дабрацца з Гродна ў ЕС — цэлая праблема
Пасля закрыцця Літвой яшчэ двух пунктаў пропуску на мяжы з Беларуссю ў найбольш складаным становішчы апынуліся жыхары Гродна — яны вымушаныя рабіць вялікі круг, каб патрапіць у прыгранічныя Беласток або Друскенікі.
Каб дабрацца з Гродна ў Беласток, які знаходзіцца за 80 кіламетраў ад беларускага абласнога цэнтра, апошнімі днямі трэба каля 2 сутак, калі ехаць аўтобусам праз Брэст.
Нашмат хутчэй можна дабрацца да Вільні. Беларуска-літоўскую мяжу ў пункце пропуску «Беняконі» аўтобусы перасякаюць за 1,5—4 гадзіны.
Але тут існуе іншая праблема — дастаць квіткі на гэтыя аўтобусы. Найбліжэйшыя вольныя месцы на выезд з Гродна ў Вільню — на 9 красавіка.
У зваротным кірунку (з Вільні ў Гродна) вольныя месцы можна адшукаць толькі на пачатак красавіка. Па стане на 16 гадзін аўторка заставалася па адным вольным месцы на 2 і 3 красавіка. На 4 красавіка ўсе білеты ўжо таксама распрададзеныя.
На гэтым фоне растуць і цэны. Калі ў лютым 2023 года дабрацца з Гродна да Беластока можна было за 60 рублёў, то цяпер — за 120. У Вільню летась можна было даехаць за 70 рублёў, цяпер — за 130.
Чаму не хапае квіткоў?
Рэч у тым, што разам з закрыццём пунктаў пропуску «Райгарад — Прывалка» і «Лаварышкі — Катлоўка» Літва вырашыла скараціць колькасць дазволаў на перавозку пасажыраў. Праз гэта скарацілася колькасць рэйсаў паміж краінамі.
Апроч гэтага, была ўведзена забарона на перасячэння мяжы пешшу або на ровары. Такі метад пераходу праз мяжу быў папулярны не толькі ў жыхароў памежных населеных пунктаў, але і ў беларусаў, якія ехалі ў Еўропу на працу.
Многія беларускія дальнабойшчыкі перасякалі мяжу на ровары, бо на іншым баку мяжы іх ужо чакалі фірмовыя мікрааўтобусы, на якіх іх давозілі да базы.
Крыху прасцей дабірацца ў Вільню з Мінска. Некалькі вольных месцаў ёсць на 27 сакавіка. Кошт білетаў — 120-125 рублёў. Аналагічная сітуацыя і ў адваротным кірунку.
А вось жыхарам Баранавічаў не пашанцавала, рэйс Баранавічы—Вільня больш не ходзіць, жыхарам райцэнтра трэба ехаць з перасадкай у Мінску. Таксама больш нельга дабрацца прамымі рэйсамі ў Вільню з Пастаў.
Усё гэта вынікі таго, што Літва з 1 сакавіка забараніла рабіць нерэгулярныя перавозкі без дазволу.
А што, калі ляцець самалётам?
Сітуацыя з чэргамі і дэфіцытам білетаў давяла сітуацыю да абсурду. Самы хуткі спосаб дабрацца з Мінска да Варшавы — паляцець туды на самалёце. І гэта нават з улікам таго, што паміж гарадамі даўно няма прамога авіязлучэння і ляцець давядзецца праз Турцыю.
Так, напрыклад, можна выляцець з Мінска ў Стамбул а 7-й раніцы і ўжо а 18-й або 19-й быць у Варшаве. Атрымліваецца, што нават з улікам перасадкі ў Стамбуле шлях на самалёце зойме каля 12 гадзін, што хутка ў параўнанні з праходжаннем мяжы на аўтобусе (у апошнія дні толькі на гэта часам сыходзіла больш за 40 гадзін).
Праўда, палёты з Мінска ў Варшаву — дарагое задавальненне. Квіткі ў адзін бок абыдуцца прыкладна ў 650—700 еўра (каля 2300—2500 рублёў).
Чытайце таксама:
На польскім кірунку чарговы антырэкорд з чэргамі з аўтобусаў. Колькі часу цяпер займае праезд праз мяжу
Чаму паток люксавых аўто ішоў праз Польшчу і як іх будуць увозіць цяпер«На мяжы калапс». Польшча ўвяла абмежаванні па ўвозе аўтамабіляў праз беларускі пагранпераход
Цяпер чытаюць
«Шынвізэ — кончаны садыст». Адзін з адыёзных начальнікаў калоніі Бабруйска перабраўся ў Германію20
Каментары