У выніку чарговага абстрэлу горада Шабекіна ў Белгародскай вобласці пацярпела пяць чалавек, заявіў кіраўнік рэгіёна Вячаслаў Гладкоў. Губернатар сцвярджае, што цэнтр і ўскраіны горада абстрэльвалі ўкраінскія вайскоўцы з рэактыўных сістэм залпавага агню «Град». Гэты ж тып зброі ён называў напярэдадні, паведамляючы пра масіраваны абстрэл.
Гладкоў напісаў у тэлеграм-канале, што новы ўдар быў нанесены «а 12-й ночы, у 3:40 і ў 5:15 УСУ».
Пра пацярпелых ён паведаміў наступнае: «Мужчына, супрацоўнік паліцыі, з адкрытым пераломам плечавой косткі. І дзве жанчыны з асколачнымі раненнямі верхніх і ніжніх канечнасцяў. Ёсць яшчэ адзін пацярпелы мужчына, гэта ахоўнік моста».
«Цяпер паступіла інфармацыя пра мужчыну, які знаходзіцца без прытомнасці са шматлікімі аскепкавымі раненнямі», — дадаў губернатар.
Ноччу ён пісаў пра двух параненых мужчын, аднаму з якіх нібыта адарвала руку, а другі атрымаў кантузію.
Гладкоў таксама паведаміў аб прамым траплянні ў прыватны жылы дом і аб «шматлікіх пашкоджаннях вокнаў і балконаў у прыватных і шматкватэрных дамах». «Ёсць дамы з прабітымі ад снарадаў сценамі», «ёсць траплянне ў дах аднаго з адміністрацыйных будынкаў, гарыць дах», «яшчэ ў адным адміністрацыйным будынку асколкамі снарада пасечаны фасад і выбітыя вокны», апісаў шкоду губернатар.
У той жа час ён назваў «фэйкам» паведамленні аб пунктах збору для тэрміновай эвакуацыі жыхароў Шабекінскай акругі. «На гэты момант масава збіраць людзей у нейкім канкрэтным месцы немагчыма і небяспечна», — растлумачыў ён.
Напярэдадні кіраўнік Белгародскай вобласці абвясціў пра пачатак эвакуацыі дзяцей у Варонежскую, Пензенскую, Яраслаўскую, Калужскую, Ліпецкую і, магчыма, у Томскую вобласці.
Украінскія ўлады не каментуюць заявы расійскіх улад пра абстрэлы Шабекіна.
У ноч на чацвер чарговы паветраны ўдар быў нанесены па Кіеве, гарадскія ўлады паведамілі пра трох загінулых жыхароў, у тым ліку пра адно дзіця.
Цяпер чытаюць
Бізнэсовец родам з Бабруйска адмовіцца ад свайго гіганцкага аўстралійскага заробку дзеля шанцу атрымаць $35 мільёнаў2
Каментары