Што такое Discord — платформа, на якой былі апублікаваныя сакрэтныя амерыканскія дакументы, і як ёй карыстацца
Як вядома, на мінулым тыдні ў сацыяльныя сеткі патрапілі сакрэтныя дакументы ЗША і НАТА. Хутка стала вядомая і асоба таго, хто гэта зрабіў. Дакументы на працягу года размяшчаліся на дыскусійнай платформе для геймераў Discord.
Пра тое, што гэта за платформа, распавядае Le Monde. Адзначаецца, што яна была створаная ў 2015 годзе і на сёння штомесяц мае каля 190 мільёнаў карыстальнікаў. Першапачаткова створаная для палягчэння галасавога абмену паміж гульцамі ў відэагульні, гэтая платформа набыла вялікую папулярнасць падчас пандэміі, калі ёй сталі карыстацца студэнты, вучні, настаўнікі і выкладчыкі для анлайн-заняткаў.
Discord са штаб-кватэрай у Сан-Францыска стала сябе пазіцыянаваць як універсальны інструмент для аўдыя, відэа і тэкставых чатаў, кшталту Skype. Праграма мае версію як для камп'ютара, так і для смартфона. Эксперты лічаць, што па сваім функцыянале яна пераўзыходзіць такія месенджары, як Telegram ці WhatsApp.
Платформа размяшчае суполкі з колькасцю ўдзельнікаў ад некалькіх чалавек да некалькіх тысяч. Яны заснаваныя на прынцыпе сервера, які карыстальнік Інтэрнэта можа адкрыць бясплатна. Ён можа зрабіць яго прыватным або агульнадаступным і запрасіць іншых людзей размаўляць у розных адкрытых каналах унутры самога сервера.
Поспех платформы некаторыя даследчыкі тлумачаць стомленасцю ад буйных сацыяльных сетак, такіх як Twitter ці Facebook, якія злучаюць мільёны карыстальнікаў Інтэрнэта і маюць шмат непрадбачаных пабочных эфектаў. Таму людзі імкнуцца да ўдзелу ў меншых суполках, дзе абʼяднаныя аднадумцы.
Аднак платформа хутка прыцягнула людзей з дэвіянтнымі схільнасцямі. Напрыклад, у 2017 годзе некалькі расследаванняў выявілі існаванне шматлікіх сервераў, звязаных з неанацысцкімі і ўльтраправымі групамі. У 2022 годзе стала вядома, што на ёй абмяркоўваў свае планы будучы забойца наведвальнікаў супермаркета ў Буфала (ЗША).
Як паказала расследаванне, першыя дакументы былі размешчаныя на серверы Thug Shaker Central, які абʼядноўваў каля дваццаці чалавек і быў даступны толькі па запрашэннях. Адзін з удзельнікаў гэтага сервера ў пачатку сакавіка перапосціў некаторыя з канфідэнцыйных дакументаў на іншым серверы. Затым другі карыстальнік размясціў фотаздымкі ў трэцім, значна больш папулярным серверы, прысвечаным картам для відэагульні Minecraft.
Чат-групы Discord нельга размяшчаць на прыватных серверах карыстальнікаў. Усе размовы, перапіска і адпраўленыя файлы захоўваюцца на серверах кампаніі. У адрозненне ад іншых месенджараў, такіх як Telegram, усе размовы ў Discord не шыфруюцца, а сама платформа мае моцную каманду мадэратараў. Яны сочаць за тым, каб карыстальнікі прытрымліваліся правілаў сэрвісу. У выпадку парушэнняў выдаюцца папярэджанні і выдаляюцца як уліковыя запісы, так і цэлыя чаты.
Усё гэта дае следчым магчымасць спадзявацца на тое, што кампанія зможа надаць неабходную інфармацыю ў рамках расследавання ўцечкі інфармацыі, якая тычыцца абмену файламі і IP-адрасаў карыстальнікаў, у першую чаргу ўдзельнікаў групы Thug Shaker Central.
Чытайце яшчэ:
Element: што за месенджар, якім карыстаюцца Бундэсвер, фіны і беларуская апазіцыя
«Небяспечны». Еўракамісія забараніла сваім супрацоўнікам карыстацца TikTok на ўсіх прыладах
Тэхналогіі, якія прыйшлі ў 2000-я і зрабілі нас шчаслівымі: інтэрнэт, мабільнікі, гульні. Настальгуем
Сілавікі расказалі, за што правялі хапун на тэнісным матчы7
Сілавікі расказалі, за што правялі хапун на тэнісным матчы
«Аднавілі грамадскі парадак, не саступіўшы патрабаванням новых выбараў». Што піша Грокіпедыя пра пратэсты, Лукашэнку, мову і як дзеліць спадчыну ВКЛ1212
Каментары