Навошта сілавікі выпытваюць пра тэлеграм-акаўнты беларусаў, нават тых, хто за мяжой?
Нядаўна спявачка Маргарыта Ляўчук паведамляла, што да яе бацькоў зноў прыходзілі сілавікі і хацелі даведацца яе кантакт у тэлеграме. Але навошта мог спатрэбіцца акаўнт? Ці можна ўзламаць яго, ведаючы нікнэйм?
Расказваем, што можа даваць сілавікам веданне кантакта ў тэлеграме.
Магчымасць пагражаць і шантажаваць
Найперш гэта магчымасць прамога кантакту ў месенджары. Калі, напрыклад, ад імя блізкага чалавека, да якога прыйшлі з ператрусам, стануць пісаць сілавікі, гэта можа быць адным з метадаў ціску.
«Прагон» па базах МУС
Гэтыя базы фармаваліся ў асноўным праз базу беларускіх тэлефонаў у Telegram і пасля затрыманняў іншых людзей. Таксама ў ёй утрымліваюцца паведамленні з вядомых сілавікам мясцовых чатаў, што можа пагражаць завядзеннем новых крымінальных спраў.
Пошук па адкрытых звестках
Часта чалавек са свайго непублічнага акаўнта ўступае ў розныя лакальныя чаты або піша ў чатах нейкіх ініцыятыў. Веданне акаўнта можа дазволіць «лакалізаваць» чалавека: то-бок зразумець, дзе прыкладна ён жыве і куды ездзіў у розныя часы.
Спробы ўзлому магчымыя?
Ведаючы толькі імя карыстальніка або ID, узламаць акаўнт у тэлеграме немагчыма. Калі ваш акаўнт на беларускай сім-карце і ў вас стаіць двухфактарная аўтэнтыфікацыя, то ўзламаць вас у сілавікоў таксама не атрымаецца, але яны могуць проста «скінуць» ваш акаўнт — выдаліць яго без вашага ведама.
Яшчэ сілавікі могуць скінуць фішынгавую спасылку і з дапамогай сацыяльнай інжынерыі змусіць вас аддаць ім свой акаўнт — нядаўна ў падобнай сітуацыі аказаўся ютуб-канал блогера Андрэя Павука. Ініцыятыва CyberBeaver нядаўна таксама паведаміла пра тое, што пачасціліся спробы ўзлому тэлеграм-акаўнтаў шляхам фішынгавых атак, і апісала іх механізм.
Як ад гэтага абараніцца?
— Перанясіце свой акаўнт на замежны нумар. Па-першае, так вы не згубіце акаўнт, калі згубіце беларускую сім-карту. Па-другое, немагчыма будзе ўзламаць акаўнт праз крадзеж SMS для ўваходу ў акаўнт, які прыходзіць на ваш беларускі нумар.
— Незалежна ад таго, за мяжой вы ці не, наладзьце двухфактарную аўтэнтыфікацыю акаўнта і схавайце нумар тэлефона, а калі дадаяце людзей у кантакты, то не «адкрывайце» ім нумар. Таксама можна абмежаваць тых, хто вам можа тэлефанаваць. Гэта дапаможа абараніць ваш акаўнт, калі вас паспрабуюць узламаць.
— Не адказвайце на дзіўныя паведамленні, якія просяць вашыя даныя. Нельга ўводзіць даныя свайго акаўнта нідзе, акрамя ўласна кліентаў у рэсурсах Telegram — месенджар не просіць дадатковых уваходаў, калі вы ўжо залагіненыя.
— «Кіберпартызаны» раяць усталяваць «партызанскі тэлеграм» і мець два акаўнты — адзін для «актывісцкага» жыцця, а іншы — «чысты». З «чыстага» акаўнта лепш стасавацца з «непалітычнымі» знаёмымі і сваякамі.
Пры падрыхтоўцы гэтага матэрыялу нам дапамаглі прадстаўнікі «Кіберпартызанаў» і ініцыятывы CyberBeaver, якая бясплатна кансультуе беларусаў па пытаннях лічбавай бяспекі.
«Наша Нiва» — бастыён беларушчыны
ПАДТРЫМАЦЬЦяпер чытаюць
«Франак, адносіны паміж людзьмі могуць будавацца не толькі на маніпуляцыях». Пракоп‘еў даў водпаведзь Бяспалаву. І Вячорку29
Каментары