Белстат апублікаваў трывожныя звесткі аб росце запазычанасці беларускіх прадпрыемстваў. Таксама пасля адноснага зацішша ў сакавіку попыт на замежную валюту на Беларускай валютна-фондавай біржы зноў пачаў значна перавышаць прапанову.
Белстат апублікаваў трывожныя звесткі аб росце запазычанасці беларускіх прадпрыемстваў. Таксама пасля адноснага зацішша ў сакавіку попыт на замежную валюту на Беларускай валютна-фондавай біржы зноў пачаў значна перавышаць прапанову.
Гэта можа быць знакам новага назапашвання фінансавых праблемаў у беларускай гаспадарцы, абцяжаранай усё большым дэфіцытам замежнагандлёвага балансу і падточанай недаверам да нацыянальнай валюты.
На таргах 10 і 15 красавіка абодва дні попыт на даляры перавышаў прапанову на 24 мільёны, 8 красавіка — на 17 млн. Сёння, 16 красавіка, розніца склала амаль 11 мільёнаў. Астатнія дні апошняй дэкады попыт прыкладна раўняўся прапанове.
Такія нажніцы амаль адпавядаюць найгоршым для золатавалютных запасаў Нацбанку прамежкам канца 2008 году.
Курс даляра на працягу апошняга месяца вагаецца нязначна, складае на 16 красавіка 2826 рублёў. Нязменнымі застаюцца і суадносіны рубля з валютным кошыкам.
Алею ў агонь валютнага рынку, несумненна, падліе і ўчорашняя ацэнка Пуціна, што крэдытная запазычанасць Беларусі дасягае пагрозлівых памераў. Гэтае выказванне мае асаблівае значэнне, калі ўлічыць, што Расія апошнія 15 гадоў была асноўным донарам і крэдыторам Беларусі. Паводле ацэнкі пасла Расіі ў Беларусі Сурыкава, у 2008 годзе памер толькі энергетычнай датацыі дасягнуў 11,5 млрд даляраў. Паводле ацэнак МВФ, у 2009 годзе Беларусь мае патрэбу ў 10,7 млрд даляраў замежных крэдытаў для выканання сваіх фінансавых забавязанняў перад насельніцтвам і замежнымі партнёрамі.
Усе 2000-я гады Беларусь падтрымлівала высокія дзяржаўныя выдаткі, у выніку чаго на сёння золатавалютныя запасы краіны ў прапорцыі да ВУП найніжэйшыя у рэгіёне Цэнтральнай і Ўсходняй Еўропы.
16 красавіка Белстат апублікаваў чарговыя трывожныя звесткі: запазычанасць беларускіх прадпрыемстваў па крэдытах і пазыках на 1 сакавіка 2009 году склала 42,54 трлн рублёў і павялічылася проці 1 сакавіка 2008 году ў 1,5 разу. Пратэрмінаваная запазычанасць за той жа перыяд вырасла на 47,4% да 633,27 млрд. рублёў.
І першая, і другая лічба значна перавышаюць і тэмп інфляцыі, і працэнт дэвальвацыі рубля адносна даляра і еўра.
Цяпер чытаюць
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў2
Каментары