Гомасэксуальны хіт «Гарбатая гара» ў Менску.
Гарбатая гара (Brokeback Mountain)
ЗША, 2005, каляровы, 134 хв.
Жанр: Мэлядрама паводле апавяданьня Эні Прулкс
Адзнака: 5,5 (з 10)
Пад небам штату Ваёмінг сустракаюцца два каўбоі, якія пасьвяць авечкі на Гарбатай гары. Адылі высьвятляецца, што героі ня здольныя жыць адзін без аднаго...
Скандальна-маркотная карціна Энга Лі паліткарэктна прыстасаваная да масавай аўдыторыі. Для геяў – любоўная гісторыя, для мужчынаў-гетэрасэксуалаў – сяброўства й цяжкасьці сямейнага жыцьця, для жанчынаў – дамскі раман, акуратна прычасаны да аднаполых жарсьцяў. Згодна зь іхнім канонам, адзін з герояў імкнецца да сумеснага жыцьця, другі – да гэтага не гатовы. Адзін гіне – другі плача ад болю.
Хаця героі – каўбоі, карціна ня вэстэрн, а папарасьцягнутая эпічная мэлядрама. У гэтай мэлядраме няшмат гавораць, стрыманыя жэсты й позіркі, а прырода Гарбатай гары зачароўвае.
Героі карціны – прыгажуны Гіт Лэджэр (таксама вядомы, як герой «Казановы») і Джэйк Джыленхал (новая зорка).
Амэрыканскі фільм пра нестандартных каўбоеў здаецца для нас далёкім. Але пазалачоная гісторыя («Залаты леў», «Залаты глёбус», «Оскар» за музыку) – падазрона нагадвае сацрэалістычны канон з «пралетарска-блакітнымі» інтанацыямі. Нават жонкі герояў выглядаюць «клясава чужымі» пэрсанажамі (фільм ужо абвінавацілі ў «нэамарксісцкай гомасэксуальнай прапагандзе»).
«Сацрэалістычная» «Гарбатая гара» – карціна нуднаватая, карэктна-трагічная і з акуратным стылёвым фальшам, што ня выпрастае і магіла.
Сэансы:
Менскі кінатэатар «Перамога» 24-25 красавіка а 20.30;
26-30 красавіка – 16.10, 18.50.
Ільготны сэанс – 30 красавіка 16.10.
Андрэй Расінскі
-
КДБ запусціў новы бот у тэлеграме для вярбоўкі беларусаў за мяжой. Прапануюць расклейваць улёткі, фатаграфаваць аб'екты і «нешта іншае»
-
У продажы з’явілася пашыранае англамоўнае выданне кнігі Алеся Бяляцкага
-
«Хто праз вёску едзе — спыняецца, фатаграфуе». Беларуска расказала пра гісторыю векавога дрэва на сваёй сядзібе
Каментары