Школа маладых менеджараў публічнага адміністравання аб'яўляе шосты набор слухачоў
Міжнародная асветніцкая праграма «Школа маладых менеджараў публічнага адміністравання» аб'яўляе чарговы набор слухачоў.
Праграма накіравана на фарміраванне ў Беларусі супольнасці маладых людзей, кампетэнтных у сферы дзяржаўнага кіравання на розных узроўнях.
Да ўдзелу ў праграме запрашаюцца мэтанакіраваныя людзі ва ўзросце 25—40 гадоў, якія пастаянна пражываюць у Беларусі, маюць вышэйшую адукацыю, валодаюць ангельскай мовай, занятыя ў сферах дзяржаўнага кіравання, адукацыі, сацыяльнай працы, а таксама ў бізнэсе, грамадскіх арганізацыях і палітычным жыцці.
Арганізацыйна праграма складаецца з чатырох вочных навучальных сесій і міжсесійнай працы ўдзельнікаў, якая ўключае самастойны аналіз матэрыялаў сесій, удзел у круглых сталах з прадстаўнікамі беларускай экспертнай супольнасці, палітыкамі і дыпламатамі, а таксама правядзенне прэзентацый па тэматыцы школы для «аднакласнікаў».
Праграма сфакусаваная на актуальнай для Беларусі праблематыцы і магчымасці ўжыць атрыманыя навыкі ў галіне публічнага адміністравання. Удзельнікі атрымліваюць веды ў сферы паліталогіі, эканомікі, рэгіянальнага развіцця, мясцовага самакіравання, прыватна-дзяржаўнага партнёрства, электроннага кіравання, працы са СМІ і грамадскай думкай, інстытутаў ЕС.
Выкладчыкамі школы з'яўляюцца вядомыя навукоўцы — эканамісты, палітолагі, сацыёлагі, журналісты, спецыялісты па публічным адміністраванні з Беларусі, Грузіі, Літвы і Швецыі, а таксама міжнародна прызнаныя эксперты з іншых дзяржаў.
Рабочыя мовы школы: англійская, беларуская, руская.
Крытэрыі адбору ўдзельнікаў:
• узрост ад 25 да 40 гадоў;
• вышэйшую адукацыю;
• валоданне ангельскай мовай на ўзроўні разумення тэкстаў, працы і ўдзелу ў дыскусіях;
• грамадзянская актыўнасць: сяброўства ў грамадскіх аб'яднаннях, партыях, прафесійных саюзах і г.д.;
• гатоўнасць удзельнічаць ва ўсіх відах дзейнасці школы: вочных сесіях, семінарах, круглых сталах і іншых відах міжсесійнай працы;
• лідарскія якасці, камунікабельнасць, крэатыўнасць.
Заяўкі на ўдзел у праграме прымаюцца па адрасе [email protected] да 24:00 5 лютага.
Заяўка запаўняецца на англійскай мове. Форма заяўкі прыкладаецца.
Цяпер чытаюць
«Людзі, будзьце пільныя! У такой сітуацыі можа апынуцца кожны жыхар ЕС!» Грамадзянін Літвы, асуджаны ў Беларусі да 13 гадоў за «шпіянаж», перадаў ліст з калоніі3939
Каментары