Mask choča pabudavać horad na Miesiacy za 10 hadoŭ. Čamu ŭžo nie na Marsie?

Horad na Miesiacy, jaki možna stvaryć mienš čym za 10 hadoŭ — mienavita taki płan niadaŭna pradstaviŭ Iłan Mask, piša Bi-bi-si.

Kiraŭnik X, Tesla i SpaceX — a taksama samy bahaty čałaviek u śviecie — paviedamiŭ u dopisie na X, jaki prahladzieli bolš za 40 miljonaŭ razoŭ, što SpaceX źmianiła fokus z budaŭnictva horada na Marsie na stvareńnie horada na Miesiacy.

Ale čamu Mask źmianiŭ svaju dumku? I što viadoma pra hety horad na Miesiacy?

Miesiac zamiest Marsa

Pakul što niama farmalnaha, detalova raspracavanaha płana z čarciažami dla hetaha horada. Zamiest hetaha isnuje bačańnie, jakim Mask padzialiŭsia na svajoj płatformie X.

Jon apisaŭ stvareńnie pastajannaha čałaviečaha pasielišča, jakoje pastupova budzie pašyracca dziakujučy vykarystańniu resursaŭ Miesiaca i čaściejšym zapuskam rakiet na Miesiac.

U svaim dopisie Mask zajaviŭ, što hetaha možna dasiahnuć «mienš čym za 10 hadoŭ, tady jak Mars zojmie bolš za 20 hadoŭ».

«Misija SpaceX zastajecca niaźmiennaj: raspaŭsiudžvać śviadomaść i žyćcio, jakija my ich viedajem, da zorak», — adznačyŭ Mask.

Jon patłumačyŭ, što padarožža na Mars mahčyma tolki tady, kali «płaniety vyraŭnoŭvajucca kožnyja 26 miesiacaŭ (pieralot doŭžycca šeść miesiacaŭ)».

Zamiest hetaha, pavodle jaho słoŭ, «my možam zapuskać rakiety na Miesiac kožnyja 10 dzion (padarožža ciahniecca dva dni)».

«Heta aznačaje, što my možam značna chutčej udaskanalvać technałohii, kab zaviaršyć budaŭnictva horada na Miesiacy, čym na Marsie», — ličyć Mask.

Jon napisaŭ, što SpaceX i dalej imkniecca realizavać svaju daŭniuju ambicyju — stvaryć horad na Marsie, i «pačnie heta rabić prykładna praź piać-siem hadoŭ», ale hałoŭny pryjarytet — «zabiaśpiečyć budučyniu cyvilizacyi, a Miesiac daje mahčymaść zrabić heta chutčej».

Prychilniki Maska chutka pačali stvarać eskizy budučaha horada na Miesiacy, niekatoryja vykarystoŭvali dla hetaha jaho instrumient štučnaha intelektu Grok.

Jaho słovy pieraklikajucca z materyjałam Wall Street Journal, apublikavanym hetym miesiacam. Tam išłosia pra toje, što SpaceX paviedamiła inviestaram ab namiery nadavać pryjarytet misijam na Miesiac, a padarožža na Mars adkładać. Taksama płanujecca bieśpiłotnaja pasadka na Miesiacy ŭ sakaviku 2027 hoda.

Hetaja źmiena kantrastuje z daŭnim fokusam Maska na Mars jak hałoŭnaj mety kampanii. Jašče ŭ minułym hodzie jon zajaviŭ, što SpaceX płanuje adpraŭlać bieśpiłotnuju misiju na Mars da kanca 2026 hoda.

«Nie, my adrazu lacim na Mars. Miesiac — nie», — kazaŭ Mask u studzieni minułaha hoda ŭ adkaz na post z X.

Jon viadomy tym, što ŭstaloŭvaje ambitnyja terminy dla prajektaŭ, takich jak elektramabili i aŭtanomnaje vadžeńnie, jakija nieadnarazova nie atrymlivalisia realizavać u termin.

Jak heta možna zrabić?

Doktar Sonhvu Lim, staršy vykładčyk pa kaśmičnych daśledavańniach i pryborach u Surejskim univiersitecie ŭ Vialikabrytanii, nazyvaje płan SpaceX «ambicyjnym», ale nie «navukovaj fantastykaj».

«Asnoŭnaja ideja — vykarystoŭvać hlebu Miesiaca dla vytvorčaści kisłarodu, vady i budaŭničych materyjałaŭ — hruntujecca na pramysłovych pracesach, jakija ŭžo prymianiajucca na Ziamli. Tearetyčna heta mahčyma», — skazaŭ jon BBC.

Adnak, pavodle słoŭ Lima, hałoŭnaje pytańnie — ci zmohuć hetyja sistemy nadziejna pracavać u składanych umovach Miesiaca: pry ekstremalnych tempieraturach, drobnym pyle, nizkaj hravitacyi i abmiežavanym enierhazabieśpiačeńni.

«Ich jašče treba naležnym čynam pratestavać na pavierchni Miesiaca», — dadaŭ jon.

Jon adznačyŭ, što dziaržaŭnyja kaśmičnyja ahienctvy dziejničajuć «achajna», bo zaležać ad dziaržaŭnaha finansavańnia i palityčnych cykłaŭ. SpaceX, pavodle jaho słoŭ, «pracuje inakš».

«Kali ich novaja rakieta budzie pracavać jak płanujecca, jany zmohuć čaściej i tańniej dastaŭlać abstalavańnie na Miesiac, što paskoryć prahres», — skazaŭ jon.

Doktar Uhur Hiuvien, dyrektar Centra aerakaśmičnych i enierhietyčnych daśledavańniaŭ univiersiteta GD Goenka ŭ Indyi, ličyć, što Miesiac maje klučavuju pieravahu nad Marsam: chutkaja pastaŭka i mahčymaść apieratyŭnaj dapamohi.

«Kali niešta pojdzie nie tak, možna chutka adpravić novuju misiju», — skazaŭ jon, adznačyŭšy, što padarožža ź Ziamli zvyčajna ciahniecca «dva-try dni».

Niahledziačy na heta, Lim papiaredžvaje, što «sapraŭdy samadastatkovy horad na Miesiacy» — heta addalenaja pierśpiektyva.

«Vyroščvańnie ježy biez pastaŭki pažyŭnych rečyvaŭ ź Ziamli i stvareńnie zamknionaj sistemy pierapracoŭki — značna bolš składanyja zadačy. Heta, vierahodna, zojmie dziesiacihodździ», — ličyć jon.

Pavialičyć

Prafiesar Kłajv Nił z Univiersiteta Notr-Dam pahadžajecca.

«Pakul my nie praviadziom poŭnamaštabnuju raźviedku resursaŭ, kab dakazać, što ich možna ekanamična zdabyvać, my nie viedajem, dzie mienavita budavać taki horad», — kaža jon.

Lim ličyć realistyčnym, što nievialikaja misiačnaja baza zmoža pačać vyrablać kisłarod i, mahčyma, zdabyvać vadu na praciahu nastupnych 10 hadoŭ.

«Heta byŭ by vialiki praryŭ», — kaža daśledčyk.

Džefry Hofman, były astranaŭt NASA, ličyć, što zabieśpiačeńnie bazy na Miesiacy mahčymaje ŭžo zaraz, kali SpaceX i Blue Origin — kaśmičnaja kampanija zasnavalnika Amazon Džefa Biezasa — stvoriać pasadačnyja moduli.

«Ale Mars — heta ŭsio jašče zanadta składany nastupny krok», — kaža Hofman.

U toj ža čas jon adznačaje, što dośvied stvareńnia misiačnych pasieliščaŭ moža dapamahčy ŭ budučyni na Marsie.

Hiuvien pahadžajecca i dadaje, što Miesiac moža stać «płacdarmam» dla dalejšych kaśmičnych daśledavańniaŭ.

Rost kankurencyi

Zajavy Maska źjavilisia na fonie kankurencyi ZŠA i Kitaja ŭ viartańni ludziej na Miesiac u hetym dziesiacihodździ. Apošni raz ludzi byli tam u 1972 hodzie padčas misii Apollo 17.

Mask taksama niadaŭna abviaściŭ, što SpaceX nabyła jaho kampaniju štučnaha intelektu xAI. Ździełka acaniła SpaceX u 1 tryljon dalaraŭ, a xAI — u 250 miljardaŭ.

Heta moža padtrymlivać jaho płan raźmiaščeńnia data-centraŭ u kosmasie dla apracoŭki vialikich abjomaŭ vyličeńniaŭ štučnaha intelektu.

Mask aptymizuje svaje biźniesy pierad mahčymym vychadam SpaceX na biržu, što moža prynieści da 50 miljardaŭ dalaraŭ.

Minułym miesiacam jon abviaściŭ płany stvaryć miljon data-centraŭ u kosmasie, kab zadavolić pastajanny rost popytu na vyličalnyja mahutnaści.

Adnak niekatoryja ekśpierty staviacca da hetaha skieptyčna i adznačajuć, što ŭ vakuumie kosmasu niama pavietra dla achałodžvańnia hrafičnych pracesaraŭ, jakija krytyčna važnyja dla ŠI.

U minuły paniadziełak Mask zajaviŭ, što NASA składzie mienš za 5% dachodaŭ SpaceX u hetym hodzie. SpaceX źjaŭlajecca klučavym padradčykam u prahramie Artemis i adkazvaje za pasadku astranaŭtaŭ na Miesiac.

• 0
• 0
• 0
• 0
• 0
• 0
• 0
• 0