U 2025 u Rasii apublikavali na 40% bolš niekrałohaŭ pa vajskoŭcach, čym u 2024
«Ruskaj słužbie Bi-bi-si» i «Miedyjazonie», razam z kamandaj vałancioraŭ, da čaćviortaj hadaviny poŭnamaštabnaha rasijskaha ŭvarvańnia va Ukrainu ŭdałosia ŭstanavić imiony 200 186 rasijskich vajskoŭcaŭ, zahinułych na vajnie. Ahulnaja kolkaść strat rasijskich vojskaŭ dasiahnuła 308—445 tysiač zabitymi.
Jak adznačaje «Bi-bi-si», za apošni miesiac kolkaść zapisaŭ u bazie, jakuju viaduć žurnalisty, pavialičyłasia na 35 tysiač čałaviek, ale heta nie źviazana ź situacyjaj na froncie.
«Za minuły miesiac nam udałosia supastavić zapisy, sabranyja za niekalki hadoŭ, z adkrytymi danymi dziaržaŭnych baz — u pieršuju čarhu, sa śpisami rejestra spadčynnych spraŭ», — tłumačyć vydańnie.
Žurnalisty adznačajuć, što z vysokaj dolaj upeŭnienaści možna skazać, što 2025 hod staŭ samym krovapralitnym dla rasijskaj armii.
«Bi-bi-si» i «Miedyjazona» paćvierdzili imiony 49 935 rasijskich vajskoŭcaŭ, zahinułych u minułym hodzie. U 2024 hodzie zahinuli prynamsi 83 706 rasijskich sałdat i aficeraŭ, ale «masiŭ jašče nieapracavanych niekrałohaŭ, u jakich u jakaści daty hibieli abo daty pachavańnia zhadvajecca 2025 hod, naličvaje jašče dziasiatki tysiač zapisaŭ».
Pavodle papiaredniaj acenki, kolkaść zahinułych u minułym hodzie moža pieravysić 90 tysiač čałaviek.
Jak piša «Miedyjazona», 122,7 tysiačy zahinułych rasijskich vajskoŭcaŭ adnosilisia da haradskoha nasielnictva, 57,2 tysiačy — da sielskaha.
Bujnyja harady i harady-miljońniki «vajnoj amal nie zakranutyja»: dźvie traciny zahinułych žyli ŭ nasielenych punktach mienš za 100 tysiač čałaviek.
Pa absalutnaj kolkaści zahinułych naviersie śpisu iduć Baškartastan (7,7 tysiačy), Tatarstan (6,8 tysiačy) i Śviardłoŭskaja vobłaść (6,3 tysiačy).
Siarod bujnych rehijonaŭ pieršaje miesca pa stratam na dušu nasielnictva zajmaje Tyva (476 čałaviek na 100 tysiač nasielnictva), zatym iduć Buratyja (400 zahinułych na 100 tysiač nasielnictva), Zabajkalski kraj (362 na 100 tysiač), Respublika Ałtaj (316 na 100 tysiač).
Rasśledavalniki «Ruskaj słužby Bi-bi-si» i «Miedyjazony» adznačajuć, što jany zdolnyja vyjaŭlać mienš za dźvie trecija ahulnaj kolkaści śmierciaŭ.
«Realnyja straty rasijskaha boku vyšejšyja za tyja, što nam udajecca vyjavić pa adkrytych krynicach, — pryznajuć daśledčyki. — Pavodle acenak vajennych analitykaŭ, naš padlik pa mohiłkach, miemaryjałach i niekrałohach pakryvaje ad 45% da 65% ad faktyčnaj kolkaści zahinułych.
Heta tłumačycca tym, što značnaja častka cieł vajskoŭcaŭ, jakija zahinuli za apošnija miesiacy, moža pa-raniejšamu zastavacca na poli boju: ich evakuacyja źviazana z ryzykaj dla žyvych, pierš za ŭsio praz udary bieśpiłotnikaŭ.
Z ulikam pryviedzienaj vyšej acenki, realnaja kolkaść zahinułych z rasijskaha boku moža być u dyjapazonie ad 308 000 da 445 000 čałaviek», — pišuć aŭtary.
Heta supadaje z acenkami zachodnich raźviedak, jakija havorać pra prykładna 350 tysiač zabitych i miljon paranienych rasijskich vajskoŭcaŭ.
«U 2025 hodzie było apublikavana na 40% bolš niekrałohaŭ, čym hod tamu», — adznačajuć daśledčyki i robiać vysnovu, što minuły hod byŭ samym krovapralitnym dla rasijskaj armii.
Ciapier čytajuć
Sakratar Rady biaśpieki zaklikaŭ biełarusaŭ ustrymacca ad pajezdak u Rasiju9
Kamientary