Niamiecki palityk vykryŭ rasijskuju špijonku na sustrečy Zialenskaha i Mierca ŭ Bierlinie

Palityk ad Chryścijanskaha demakratyčnaha sajuza Roderych Kizievieter zajaviŭ, što viedaŭ hetuju žančynu i raniej bačyŭ jaje ŭ rasijskaj ambasadzie, dzie jana pradstaŭlałasia pradprymalnicaj, a paźniej — ukrainkaj.

Iłona V. taksama raniej źjaŭlałasia na palityčnych i dziełavych mierapryjemstvach i navat znachodziłasia ŭ niepasrednaj blizkaści da kanclera Frydrycha Mierca i prezidenta Ukrainy Uładzimira Zialenskaha padčas Hiermana-ŭkrainskaha ekanamičnaha forumu ŭ śniežni 2025 hoda.

Pavialičyć

Na fatahrafijach z forumu ŭ Bierlinie vidać, jak jana siadzić za Miercam i Zialenskim. Uźnikaje pytańnie: jak Iłona V., nibyta pradprymalnica niamiecka-ŭkrainskaha pachodžańnia, zmahła apynucca tak blizka da kanclera?

Mahčymy adkaz daŭ palityk Chryścijanska-demakratyčnaha sajuza pa pytańniach biaśpieki, a taksama pałkoŭnik Bundeśviera Roderych Kizievieter u svajoj novaj knizie Was wollen wir? Was können wir? («Čaho my chočam? Što my možam?»). Jaho apisańnie taksama śviedčyć pra toje, što žančyna, vierahodna, doŭhi čas była pad nahladam słužbaŭ biaśpieki.

Pavodle jaho słoŭ, Iłona V. nieadnarazova pryciahvała jaho ŭvahu na praciahu apošnich dziesiaci hadoŭ.

Bild publikuje ŭryŭki z knihi Kizievietera:

«U 2015 hodzie mianie pryznačyli adkaznym pa pytańniach zamiežnaj palityki majoj parłamienckaj frakcyi i dakładčykam pa Rasii, tamu ja rehularna naviedvaŭ rasijskuju ambasadu. Tam mianie čas ad času zahavorvała ruskaja žančyna, jakaja pradstaŭlałasia pradprymalnicaj i kansultantkaj.

Adnojčy ja ŭbačyŭ jaje ŭ razmovie z pradstaŭnikom HRU.

Hetaha pradstaŭnika ja sustrakaŭ i ŭ inšych miescach, u tym liku na mierapryjemstvach fondu Adenaŭera.

Adnojčy my navat udzielničali razam u adnoj dyskusijnaj paneli. Praz hady, u druhi hod poŭnamaštabnaha ŭvarvańnia Rasii va Ukrainu, padčas dyskusii na mierapryjemstvie ŭ Bierlinie taja samaja ruskaja žančyna vystupiła i nazvałasia ŭkrainkaj.

Jana zajaviła, što stamiłasia ad taho, što jaje krainu nakačvajuć zbrojaj, i što Hiermanija svajoj padtrymkaj tolki padaŭžaje pakuty va Ukrainie. Pavodle jaje słoŭ, ludzi tam chočuć miru, i jaho možna dasiahnuć, kali ŭkraincy pierastanuć atrymlivać zbroju.

Da jaje ździŭleńnia, ja skazaŭ, što rady znoŭ jaje bačyć. Ja nahadaŭ joj, što my znajomyja pa rasijskaj ambasadzie, tady jak va ŭkrainskaj ambasadzie ja jaje nikoli nie bačyŭ. Paśla mierapryjemstva jana padyšła da mianie, kab paskardzicca. Užo ŭ pačatku razmovy jana zrazumieła, što zrabiła pamyłku. Vidavočna, tolki tady jana ŭspomniła pra našy dźvie ci try papiarednija sustrečy.

Kali ja spytaŭ jaje, čamu jana tady vystupaje jak ukrainka, jana adkazała, što źjaŭlajecca hramadziankaj Savieckaha Sajuza. Paśla hetaha ŭ mianie bolš nie zastałosia pytańniaŭ, i jana vielmi chutka syšła. Darečy, takija ludzi atrymlivajuć hrošy za padobnyja vystupy. Ci było heta ŭ jaje vypadku — ja dakazać nie mahu».

Paśla jaje aryštu stała viadoma, što da taho momantu, jak u śniežni jana pranikła ŭ druhi rad za Zialenskim i Miercam, jana ŭžo niekalki miesiacaŭ była pad nahladam niamieckaj kontrraźviedki. Vierahodna, hetamu paspryjała i publičnaje vykryćcio z boku Kizievietera.

Charakterna, što ŭ jaje byli ciesnyja suviazi ź sietkaj, jakaja stvarałasia Maskvoj na praciahu dziesiacihodździaŭ. Akramia hetaha, jana ŭdzielničała ŭ niamiecka-ŭkrainskim abaronnym kanhresie i supracoŭničała ź instytutam ź Vismara, jaki ličyŭsia strukturaj upłyvu Rasii ŭ prajekcie budaŭnictva hazapravoda «Paŭnočny patok».

Hienieralnaja prakuratura abvinavačvaje Iłonu V. u tym, što jana špijoniła ŭ Hiermanii pa daručeńni HRU. Jaje kurataram byŭ vajenny ataše rasijskaj ambasady. Urad Hiermanii ŭžo vysłaŭ hetaha aficera, a sama Iłona V. zaraz znachodzicca pad vartaj.

• 19
• 0
• 2
• 2
• 1
• 0
• 4
• 0