Нямецкі палітык выкрыў расійскую шпіёнку на сустрэчы Зяленскага і Мерца ў Берліне

Палітык ад Хрысціянскага дэмакратычнага саюза Родэрых Кізеветэр заявіў, што ведаў гэтую жанчыну і раней бачыў яе ў расійскай амбасадзе, дзе яна прадстаўлялася прадпрымальніцай, а пазней — украінкай.

Ілона В. таксама раней з'яўлялася на палітычных і дзелавых мерапрыемствах і нават знаходзілася ў непасрэднай блізкасці да канцлера Фрыдрыха Мерца і прэзідэнта Украіны Уладзіміра Зяленскага падчас Германа-ўкраінскага эканамічнага форуму ў снежні 2025 года.

Павялічыць

На фатаграфіях з форуму ў Берліне відаць, як яна сядзіць за Мерцам і Зяленскім. Узнікае пытанне: як Ілона В., нібыта прадпрымальніца нямецка-ўкраінскага паходжання, змагла апынуцца так блізка да канцлера?

Магчымы адказ даў палітык Хрысціянска-дэмакратычнага саюза па пытаннях бяспекі, а таксама палкоўнік Бундэсвера Родэрых Кізеветэр у сваёй новай кнізе Was wollen wir? Was können wir? («Чаго мы хочам? Што мы можам?»). Яго апісанне таксама сведчыць пра тое, што жанчына, верагодна, доўгі час была пад наглядам службаў бяспекі.

Паводле яго слоў, Ілона В. неаднаразова прыцягвала яго ўвагу на працягу апошніх дзесяці гадоў.

Bild публікуе ўрыўкі з кнігі Кізеветэра:

«У 2015 годзе мяне прызначылі адказным па пытаннях замежнай палітыкі маёй парламенцкай фракцыі і дакладчыкам па Расіі, таму я рэгулярна наведваў расійскую амбасаду. Там мяне час ад часу загаворвала руская жанчына, якая прадстаўлялася прадпрымальніцай і кансультанткай.

Аднойчы я ўбачыў яе ў размове з прадстаўніком ГРУ.

Гэтага прадстаўніка я сустракаў і ў іншых месцах, у тым ліку на мерапрыемствах фонду Адэнаўэра.

Аднойчы мы нават удзельнічалі разам у адной дыскусійнай панэлі. Праз гады, у другі год поўнамаштабнага ўварвання Расіі ва Украіну, падчас дыскусіі на мерапрыемстве ў Берліне тая самая руская жанчына выступіла і назвалася ўкраінкай.

Яна заявіла, што стамілася ад таго, што яе краіну накачваюць зброяй, і што Германія сваёй падтрымкай толькі падаўжае пакуты ва Украіне. Паводле яе слоў, людзі там хочуць міру, і яго можна дасягнуць, калі ўкраінцы перастануць атрымліваць зброю.

Да яе здзіўлення, я сказаў, што рады зноў яе бачыць. Я нагадаў ёй, што мы знаёмыя па расійскай амбасадзе, тады як ва ўкраінскай амбасадзе я яе ніколі не бачыў. Пасля мерапрыемства яна падышла да мяне, каб паскардзіцца. Ужо ў пачатку размовы яна зразумела, што зрабіла памылку. Відавочна, толькі тады яна ўспомніла пра нашы дзве ці тры папярэднія сустрэчы.

Калі я спытаў яе, чаму яна тады выступае як украінка, яна адказала, што з'яўляецца грамадзянкай Савецкага Саюза. Пасля гэтага ў мяне больш не засталося пытанняў, і яна вельмі хутка сышла. Дарэчы, такія людзі атрымліваюць грошы за падобныя выступы. Ці было гэта ў яе выпадку — я даказаць не магу».

Пасля яе арышту стала вядома, што да таго моманту, як у снежні яна пранікла ў другі рад за Зяленскім і Мерцам, яна ўжо некалькі месяцаў была пад наглядам нямецкай контрразведкі. Верагодна, гэтаму паспрыяла і публічнае выкрыццё з боку Кізеветэра.

Характэрна, што ў яе былі цесныя сувязі з сеткай, якая стваралася Масквой на працягу дзесяцігоддзяў. Акрамя гэтага, яна ўдзельнічала ў нямецка-ўкраінскім абаронным кангрэсе і супрацоўнічала з інстытутам з Вісмара, які лічыўся структурай уплыву Расіі ў праекце будаўніцтва газаправода «Паўночны паток».

Генеральная пракуратура абвінавачвае Ілону В. у тым, што яна шпіёніла ў Германіі па даручэнні ГРУ. Яе куратарам быў ваенны аташэ расійскай амбасады. Урад Германіі ўжо выслаў гэтага афіцэра, а сама Ілона В. зараз знаходзіцца пад вартай.

• 19
• 0
• 2
• 2
• 1
• 0
• 4
• 0