Трамп можа адмовіцца ад перадачы Германіі «Тамагаўкаў» з-за рэакцыі Пуціна
Адмена паставак ракет пакіне Германію без неабходных сродкаў абароны.
Міністэрства абароны ЗША рыхтуецца адмяніць перадачу Германіі высокадакладных крылатых ракет вялікай дальнасці Tomahawk, паведамляе Politico са спасылкай на інфармаваныя крыніцы.
Паводле іх слоў, у адміністрацыі Дональда Трампа баяцца, што Расія ўспрыме такі крок як эскалацыю і прыме меры ў адказ. Акрамя гэтага, амерыканскія чыноўнікі занепакоеныя вычарпаннем уласных арсеналаў зброі, бо ў першыя тыдні вайны з Іранам ЗША скарысталі «тысячы ракет» Tomahawk і Patriot.
Кіраўнік Пентагона Піт Хегсэт у маі заявіў Кангрэсу, што на аднаўленне запасаў спатрэбяцца «месяцы і гады».
Адмена паставак ракет пакіне Германію без неабходных сродкаў абароны, адзначылі крыніцы Politico. Пры гэтым рашэнне ЗША накладаецца на скарачэнне ваеннай прысутнасці ў Еўропе.
У прыватнасці, Вашынгтон мае намер вывеcці тысячы амерыканскіх вайскоўцаў з Германіі і ў цэлым скараціць колькасць сваіх знішчальнікаў, беспілотнікаў і марскіх падраздзяленняў у Еўропе.
У той жа час Расія ўжо даўно размясціла ракеты «Іскандэр», здольныя несці ядзерныя боегалоўкі, у Калінінградскай вобласці. Акрамя таго, расійскія вайскоўцы размясцілі ў Беларусі ракеты сярэдняй дальнасці «Арэшнік», якія патэнцыйна могуць паразіць любую кропку ў Еўропе, піша Moscow Times.
Каментары