Спявачка Лера Яскевіч распавяла, колькі зарабляе ў месяц на музыцы са стрымінгавых платформаў

У сваім інстаграме Лера Яскевіч распавяла, што за сакавік і часткова красавік зарабіла на сваёй творчасці на стрымінгавых платформах 25 даляраў — і яе гэта радуе.

— Нехта скажа, што гэта вельмі мала. Я думаю, што так і ёсць. Але з іншага боку, гэта ўжо 25 даляраў. Не 5 даляраў, не некалькі цэнтаў. Улічваючы, што музыка сапраўды мала грошай збірае, улічваючы, што ў мяне цяпер вельмі мала праслухоўванняў — 2400 за месяц на Spotify.

Лера кажа: калі кожны месяц будзе капаць па 25 даляраў, у канцы года, можа, атрымаецца назбіраць на нешта. Для параўнання, да канфлікту з менеджаркай, праз які спявачка выдаліла ўсе свае трэкі з музычных пляцовак, Лера атрымлівала ад стрымінгавых сервісаў да 300 еўра за месяц.

Цяпер артыстка мае ў сваёй бібліятэцы 14 песень. І спадзяецца, што некалі атрымаецца вярнуцца да той ранейшай сумы — але не ведае, колькі часу на гэта спатрэбіцца.

— Але наяўнасць тут хаця б нейкіх грошай дае мне надзею. Бо кожны раз, калі я бачу, што мае відэа з шыццём набіраюць больш праглядаў, думаю: «Ну ўсё, калі відэа з музыкай не збіраюць праглядаў, значыць, музыку ніхто не будзе слухаць і я не змагу жыць за яе кошт, таму трэба шукаць сябе ў іншым». Сёння з’явілася надзея.

Нагадаем, у студзені Лера Яскевіч расказала фанатам, што пасля 16 лютага яе песні перастануць быць даступнымі на ўсіх музычных пляцоўках — яна выдаліць іх самастойна. Прычынай стаў канфлікт спявачкі з яе экс-менеджаркай і ў мінулым найлепшай сяброўкай Ганнай Навіцкай.

Лера Яскевіч пазнаёмілася з Ганнай Навіцкай, калі ёй было 17 гадоў. Навіцкая дапамагла Яскевіч паступіць у Беларускі дзяржаўны ўніверсітэт культуры і мастацтваў, звазіла на ўкраінскі Х-Фактар, менеджарыла яе і была найлепшай сяброўкай — дзяўчаты нават здымалі разам кватэру.

Трэкі Леры зарэгістравалі ў Нацыянальным цэнтры інтэлектуальнай уласнасці, і, каб усё заробленае дзялілася паміж артысткай і менеджаркай 50 на 50, Ганну запісалі як аўтарку ва ўсіх песнях, нават там, дзе па факце аўтаркай не з'яўлялася. 

Сяброўства і супрацоўніцтва хапіла на 10 гадоў, пасля яно дало расколіну — Навіцкая займаецца ў Беларусі новым праектам — гуртом «Барысаўскі тракт», а Яскевіч жыве ў вымушанай эміграцыі ў Польшчы.

Абураная Ганна Навіцкая потым распавяла сваю праўду. Кажа, што яшчэ да таго, як праект «Лера Яскевіч» пачаў прыносіць стабільны даход, яна ўклала ў яго раскрутку больш за 20 тысяч даляраў уласных сродкаў.

• 2
• 0
• 0
• 0
• 0
• 0
• 0
• 2