Što viadoma pra byłoha palitviaźnia Sakałoŭskaha, jaki pamior u Bierlinie ŭ 47 hadoŭ

Pra śmierć Sakałoŭskaha napisała ŭ fejsbuku Ksienija Łuckina, byłaja palitźniavolenaja, zatrymanaja razam ź im u 2020-m:

«Pamior Dzianis Sakałoŭski. Vydatny apieratar, cudoŭny čałaviek. Były palityčny źniavoleny, jaki nikoli-nikoli nikomu nie skardziŭsia».

Sakałoŭskamu było 47 hadoŭ. Jak raskazała «Našaj Nivie» Łuckina, mužčyna pamior u Bierlinie.

Pavodle słoŭ Ksienii, 21 lutaha cieła Dzianisa znajšli jaho siabry. Peŭny čas mužčyna nie vychodziŭ na suviaź, i siabry pajechali pravieryć, jak jon — viedali, što jon drenna siabie adčuvaje:

«Jon pieranios kavid na nahach, i heta [śmierć] — faktyčna vyniki kavidu. Było niejkaje ŭskładnieńnie».

Dakładnaja pryčyna śmierci pakul nieviadomaja.

«Nie stała majho taty. Jamu było ŭsiaho 47 hadoŭ. Pakul dakładna nie viedaju, jak i što adbyłosia. Zaraz ja prosta adčuvaju bol i mnie treba zrazumieć, jak žyć dalej z hetym. Ale chaču, kab pra majho tatu pisali, kab jaho viedali i pamiatali ludzi. Bo jon byŭ cudoŭnym čałaviekam, lubiŭ ludziej i vielmi šmat zrabiŭ dla žurnalistyki i mastactva», — napisała ŭ instahramie Vasilina Sakałoŭskaja, dačka Dzianisa Sakałoŭskaha.

Paśla prezidenckich vybaraŭ 2020‑ha hoda Dzianis zvolniŭsia ź Biełteleradyjokampanii, dzie na toj čas pracavaŭ bolš za dziesiać hadoŭ. U 2017‑m Sakałoŭski jak apieratar atrymaŭ premiju «Televiaršynia» — jaho ŭznaharodzili za pracu ŭ pieradačy «Efiekt Kałabanava».

Pavialičyć

Łuckina raskazvaje pra kalehu tak:

«Jon byŭ najlepšym apierataram na BT, udzielničaŭ potym u padziejach 2020 hoda. Byŭ razam sa mnoj aryštavany 22 śniežnia 2020 hoda, bo my razam raspracoŭvali naša alternatyŭnaje telebačańnie».

Dzianisa aryštavali pa spravie «Pres-kłuba», jakuju zaviali za byccam uchileńnie ad vypłaty padatkaŭ. Jon vyjšaŭ na volu praz vosiem miesiacaŭ, 23 žniŭnia 2021-ha. Pierad hetym na rachunak Śledčaha kamiteta było pieraličana amal 110 tysiač rubloŭ kab kampiensavać straty, byccam by naniesienyja fihurantami spravy.

Ksienija Łuckina ŭdakładniaje, što Sakałoŭski vyjšaŭ ź SIZA, bo jamu źmianili mieru ŭtrymańnia. Da skančeńnia suda nad Ksienijaj u vieraśni 2022‑ha jon zastavaŭsia fihurantam spravy, a potym zmoh źjechać u Bierlin.

«Jon byŭ vielmi talenavity, adzin ź lepšych teleapierataraŭ u krainie i navat rehijonie. Da 2020‑ha hoda jon byŭ štatnym supracoŭnikam Biełteleradyjokampanii, ale za svajo prafiesijnaje žyćcio jon supracoŭničaŭ praktyčna z usimi telekampanijami našaha rehijona. Byŭ prafiesijanałam najvyšejšaha ŭzroŭniu», — kaža Łuckina pra Dzianisa.

Siabry Dzianisa źbirajucca adkryć zbor na jaho pachavańnie i ŭ dapamohu rodnym.

• 3
• 0
• 1
• 2
• 1
• 32
• 0
• 2