U Minsku abjavili pra płany stvaryć skvier na byłych katalickich mohiłkach. Ale tam užo daŭno idzie budaŭnictva
Płan, jaki prapanavali da abmierkavańnia, sastareŭ, ale jon pakazvaje, jak pavinien byŭ vyhladać kvartał, dzie znachodzicca kaścioł. Usio raptam źmianiłasia z-za budaŭnictva sakretnaha abjekta, piša Katolik.life.
Administracyja Savieckaha rajona Minska abjaviła hramadskaje abmierkavańnie ŭniasieńnia źmienaŭ u horadabudaŭničy prajekt detalovaha płanavańnia rekanstrukcyi žyłoha kvartała «Załataja Horka». Jano startuje 26 lutaha.
Jak zaŭvažyŭ Katolik.life, da abjavy prymacavanaja Tłumačalnaja zapiska detalovaha płana, datavanaja jašče 2023 hodam. Dakumient pakazvaje, u pryvatnaści, jak pavinien vyhladać kvartał «B» u miežach praśpiekta Niezaležnaści, vulicy Kazłova, bulvara Mulavina i vulicy Załataja Horka, dzie znachodzicca kaścioł śviatoha Rocha.
U płanie praduhledžany skvier płoščaj 1,65 ha ŭ zonie paŭdniova-zachodniaj uskrainy kvartała «B» na terytoryi byłych Załatahorskich mohiłak.
Ale vyhladaje tak, što dakumient sastareŭ. Vierahodna, skvier pavinien znachodzicca na pustcy, dzie ŭ 2025 hodzie raptoŭna pačali budavać budynak dla Akademii KDB.
Raskazvajučy pra płan, adznačałasia, što skvier pavinien być na miescy źniesienaj anteny-hłušyłki za kaściołam i na susiednich učastkach. Sapraŭdy, inšaha miesca takoj płoščy ŭ kvartale «B» nie vidać.
Adnak pry hetym vypuščana z-pad uvahi, što ŭsia pustka ŭ 2025 hodzie była addadzienaja pad uźviadzieńnie vialikaha abjekta, jaki ŭ pašparcie paznačany jak «budynak šmatfunkcyjanalny», a na samaj spravie źjaŭlajecca novym budynkam akademii KDB.
U płanie ž prapisana «zachavańnie najaŭnych i budaŭnictva dadatkovych novych učastkaŭ zialonych nasadžeńniaŭ ahulnaha karystańnia, u tym liku skviera pł. 1,65 ha ŭ zonie paŭdniova-zachodniaj uskrainy kvartała «B» na terytoryi byłych katalickich mohiłak z vykarystańniem hetaha ŭčastka ŭ jakaści zialonych nasadžeńniaŭ ahulnaha karystańnia i ŭparadkavańniem pad adkrytym niebam časovych niestacyjanarnych elemientaŭ vystavačnaha charaktaru».
Toje, što płan straciŭ aktualnaść, dobra vidać na kartach Google — spadarožnikavyja zdymki zafiksavali miesca budoŭli. Nižej pryvodziacca skrynšoty aktualnaj karty ŭ paraŭnańni z zachavanymi panaramnymi fota.
Da taho, jak častku ŭčastka, addadzienaha pad budaŭnictva, zabrali ŭ parafii, tam byli placoŭka dla dziaciej, ekspazicyja retra-aŭtamabilaŭ, skvier, darožki, placoŭka, na jakoj pravodzili ahulnaharadski Kryžovy šlach.
Zaraz u abnoŭlenaj kadastravaj karcie za kaściołam zamacavany ŭčastak płoščaj tolki 0,35 ha.
Raniej paviedamlałasia, što ŭ pačatku budaŭnictva na miescy byłych mohiłak ź ziamli byli padniatyja šmatlikija čałaviečyja pareštki. Ich abiacali pieradać parafii dla pierapachavańnia, ale heta pakul nie zroblena, nakolki viadoma viernikam. Jany spadziajucca, što heta ŭsio ž adbudziecca.
U płanie taksama havorycca pra pierśpiektyvu znosu małapaviarchovych budynkaŭ i haražoŭ, raźmieščanych na terytoryi byłych katalickich mohiłak. Ale tyja budynki i haražy, jakija znachodzilisia pablizu kaścioła i hłušyłki, užo byli źniesienyja razam ź joj dziela budaŭnictva taho samaha abjekta.
Ciapier čytajuć
Jakaja łohika sudoŭ za Hajun? Mužčyna, jakoha zatrymlivali pa hetaj spravie, apisaŭ ubačanaje23
Kamientary