У Мінску аб'явілі пра планы стварыць сквер на былых каталіцкіх могілках. Але там ужо даўно ідзе будаўніцтва
План, які прапанавалі да абмеркавання, састарэў, але ён паказвае, як павінен быў выглядаць квартал, дзе знаходзіцца касцёл. Усё раптам змянілася з-за будаўніцтва сакрэтнага аб'екта, піша Katolik.life.
Адміністрацыя Савецкага раёна Мінска аб'явіла грамадскае абмеркаванне ўнясення зменаў у горадабудаўнічы праект дэталёвага планавання рэканструкцыі жылога квартала «Залатая Горка». Яно стартуе 26 лютага.
Як заўважыў Katolik.life, да аб'явы прымацаваная Тлумачальная запіска дэталёвага плана, датаваная яшчэ 2023 годам. Дакумент паказвае, у прыватнасці, як павінен выглядаць квартал «Б» у межах праспекта Незалежнасці, вуліцы Казлова, бульвара Мулявіна і вуліцы Залатая Горка, дзе знаходзіцца касцёл святога Роха.
У плане прадугледжаны сквер плошчай 1,65 га ў зоне паўднёва-заходняй ускраіны квартала «Б» на тэрыторыі былых Залатагорскіх могілак.
Але выглядае так, што дакумент састарэў. Верагодна, сквер павінен знаходзіцца на пустцы, дзе ў 2025 годзе раптоўна пачалі будаваць будынак для Акадэміі КДБ.
Расказваючы пра план, адзначалася, што сквер павінен быць на месцы знесенай антэны-глушылкі за касцёлам і на суседніх участках. Сапраўды, іншага месца такой плошчы ў квартале «Б» не відаць.
Аднак пры гэтым выпушчана з-пад увагі, што ўся пустка ў 2025 годзе была аддадзеная пад узвядзенне вялікага аб'екта, які ў пашпарце пазначаны як «будынак шматфункцыянальны», а на самай справе з'яўляецца новым будынкам акадэміі КДБ.
У плане ж прапісана «захаванне наяўных і будаўніцтва дадатковых новых участкаў зялёных насаджэнняў агульнага карыстання, у тым ліку сквера пл. 1,65 га ў зоне паўднёва-заходняй ускраіны квартала «Б» на тэрыторыі былых каталіцкіх могілак з выкарыстаннем гэтага ўчастка ў якасці зялёных насаджэнняў агульнага карыстання і ўпарадкаваннем пад адкрытым небам часовых нестацыянарных элементаў выставачнага характару».
Тое, што план страціў актуальнасць, добра відаць на картах Google — спадарожнікавыя здымкі зафіксавалі месца будоўлі. Ніжэй прыводзяцца скрыншоты актуальнай карты ў параўнанні з захаванымі панарамнымі фота.
Да таго, як частку ўчастка, аддадзенага пад будаўніцтва, забралі ў парафіі, там былі пляцоўка для дзяцей, экспазіцыя рэтра-аўтамабіляў, сквер, дарожкі, пляцоўка, на якой праводзілі агульнагарадскі Крыжовы шлях.
Зараз у абноўленай кадастравай карце за касцёлам замацаваны ўчастак плошчай толькі 0,35 га.
Раней паведамлялася, што ў пачатку будаўніцтва на месцы былых могілак з зямлі былі паднятыя шматлікія чалавечыя парэшткі. Іх абяцалі перадаць парафіі для перапахавання, але гэта пакуль не зроблена, наколькі вядома вернікам. Яны спадзяюцца, што гэта ўсё ж адбудзецца.
У плане таксама гаворыцца пра перспектыву зносу малапавярховых будынкаў і гаражоў, размешчаных на тэрыторыі былых каталіцкіх могілак. Але тыя будынкі і гаражы, якія знаходзіліся паблізу касцёла і глушылкі, ужо былі знесеныя разам з ёй дзеля будаўніцтва таго самага аб'екта.
Бабарыка пра сябе ў 2020-м: Гэта не наіўнасць. Не думаю, што такога крыважэрнага сцэнара нехта чакаў79
Каментары