Hanna Złatkoŭskaja i jaje siamja bolš za sutki praviali ŭ vienskim aeraporcie. Ci zapłaciać im kampiensacyju?

Kałumnistka i asabistaja pamočnica demakratyčnaj lidarki Śviatłany Cichanoŭskaj Hanna Złatkoŭskaja razam z mužam i synam pajechała na niekalki dzion u Vienu na kanikuły. Ale viartańnie dadomu ŭ Vilniu atrymałasia značna bolš pryhodnickim, čym płanavałasia: u svaim fejsbuku jana apisała, jak praź śniehapad i masavyja admieny rejsaŭ siamja zatrymałasia ŭ vienskim aeraporcie bolš za sutki. Padarožža nazad u vyniku pieratvaryłasia ŭ noč na žorstkich aeraportnych łaŭkach i impravizavany maršrut praz Varšavu.

«Nočyć u vienskim aeraporcie na žorstkich łaŭkach — vykanana. Heta byŭ cikavy dośvied», — piša Hanna Złatkoŭskaja.

Pavodle jaje słoŭ, rejs Viena — Vilnia pavinien byŭ vylatać u 13:15, ale jaho praź śniehapad pieranieśli na viečar — 21:15.

«My rasstroilisia. Pakul nie ŭbačyli tabło, na jakim nie było ničoha, akramia čyrvonaha nadpisu «admieniena». Dobra, nam jašče pašancavała, my vydychnuli i pajšli šukać ježu na vaŭčary ŭ čatyry jeŭra, jakija nam vydali. My kupili chałodnyja buterbrody i kołu. Napieradzie było jašče vosiem hadzin čakańnia», — raspaviadaje Hanna.

Ale praź niejki čas ich rejs prosta źnik z tabło. 

«Ryanair maŭčaŭ. Potym dasłaŭ paviedamleńnie: prabačcie, admieniena. I voś tut pačałasia panika», — piša Złatkoŭskaja. 

Pavodle jaje, pieršymi ŭ hetaj situacyi adhuknulisia siabry: «Ludzi adrazu pačali pisać, telefanavać i raskazvać, što rabić. Jak ža pryjemna viedać, što ŭ kryzisnaj situacyi ŭ ciabie jość tyja, chto dapamoža».

Chtości šukaŭ aŭtobusy i ciahniki, chtości dasyłaŭ spasyłki na sajty, dzie možna padać zajaŭku na viartańnie hrošaj, chtości prosta padtrymlivaŭ.

«Uvohule, uchutali padtrymkaj, ale ja jašče pražyvała stadyju admaŭleńnia. Jana chutka źmianiłasia stadyjaj hnievu», — pryznajecca aŭtarka.

U vyniku siamja vyrašyła nie čakać i kupiła novyja bilety na samalot u Varšavu, na 6 hadzin ranicy: «Kvitki ŭ Vilniu byli tolki ŭ niadzielu viečaram i zusim pa inšaj canie. Ni takich hrošaj, ni žadańnia načavać dva dni ŭ aeraporcie ŭ nas nie było».

Čerhi razzłavanych z-za admieny rejsaŭ ludziej da stojki avijakampanii, pavodle jaje apoviedu, byli «kiłamietry na try». Muž Hanny viarnuŭsia adtul z navinami:

«Ryanair nie daje kuponaŭ ni na hatel, ni na ježu i viartaje hrošy za bilety tolki na nastupny dzień. A tyja nie pakryvajuć košt novych kvitkoŭ na samalot».

Tady jany vyrašyli pryniać situacyju: «Značyć, my ŭsio zrabili pravilna».

Napieradzie była noč u aeraporcie, kramy ŭžo začynilisia, a ź ježy ŭ ich byli tolki čypsy i koła. U kalidory aeraporta nieŭzabavie zastalisia tolki jany adny: «My ssunuli łaŭki, zrabiŭšy sabie ŭtulny kutok. Ja ž kazała, što z tych ludziej, jakija zrobiać utulnaść navat u kardonnaj skryncy».

Hanna apisvaje, jak hučali kołcy čamadanaŭ u cišyni načnoha aeraporta: «Jany stvarajuć taki pryjemny šum, byccam jeduć ciahniki abo miechanična chvalujecca mora». Samy cichi čas, pavodle jaje, «niedzie pamiž druhoj z pałovaj i treciaj nočy», kali ŭ kalidorach «ni šołachu, ni huku (nie ličačy chrapu i sapieńnia troch biełarusaŭ, jakija śpiać na žorstkich łaŭkach)». 

Ranicaj rejs u Varšavu ŭsio ž adbyŭsia. Tam biełarusy praviali niekalki hadzin u siabroŭ, a paśla viarnulisia ŭ Vilniu aŭtobusam. Ciapier jany pasprabujuć viarnuć hrošy za bilety na aŭtobus «prosta dziela cikavaści».

«My doma. Spali ŭ svaich łožkach — i boža, jakoje heta ščaście! Inšych vysnoŭ, ułasna, bolš niama. Ach tak, Viena cudoŭnaja!» — tak zaviaršaje svoj apovied Hanna Złatkoŭskaja.

Ci mohuć pasažyry atrymać kampiensacyju

U ES dziejničaje rehłamient №261/2004, pavodle jakoha pasažyry majuć prava na fiksavanuju kampiensacyju (dla karotkich rejsaŭ heta zvyčajna kala 250 jeŭra na čałavieka niezaležna ad realnaj cany bileta), kali rejs admienieny. Hetaje prava nie dziejničaje ŭ vypadku «nadzvyčajnych abstavin», u tym liku mocnaha śniehapadu ci zakryćcia aeraporta praz nadvorje.

Treba raźbiracca — mahčyma, Hanna Złatkoŭskaja ŭsio ž atrymaje prava na kampiensacyju. Kali astatnija avijakampanii adnavili paloty paśla śniehapadu, a tolki Ryanair uvohule admianiŭ rejs, to prykrycca nadvorjem budzie składana.

Ale navat kali nadvorje pryznajuć fors-mažoram, častku vydatkaŭ usio ž možna pasprabavać kampiensavać. Pasažyry ŭsio roŭna majuć prava na viartańnie hrošaj za bilety i pierabraniravańnie, a ŭ asobnych vypadkach — na pakryćcio častki dadatkovych vydatkaŭ. Tamu padać zajaŭku na viartańnie srodkaŭ u lubym vypadku varta.

• 0
• 0
• 2
• 3
• 0
• 1
• 0
• 0