Biervušy — heta vyratavańnie, kali pobač hučna chrapie partnior abo za aknom nie ścichaje horad. Jany sapraŭdy mohuć uratavać son i navat adnosiny. Adnak miedycynskija ekśpierty papiaredžvajuć, što karystacca imi kožnuju noč — nie najlepšaja ideja.
Pra nastupstvy pastajannaha vykarystańnia biervušaŭ z daktarami-otałarynhołahami pahavaryli žurnalisty The New York Times. Śpiecyjalisty tłumačać, što čałaviečaje vucha maje ŭłasny miechanizm samaačyščeńnia. Unutry słychavoha prachodu isnujuć mikraskapičnyja vałasinki i załozy, jakija vypracoŭvajuć sieru dla abarony ad pyłu i bakteryj.
Dziakujučy pracesu, viadomamu jak epitelijalnaja mihracyja, vierchni płast skury ŭnutry vucha pastupova ruchajecca da vychadu, niby mikraskapičny kanviejer, naturalnym čynam vynosiačy liški siery.
Kali ž čałaviek štoviečar ustaŭlaje ŭ vucha starońni pradmiet (biervušy, navušniki, ci navat vatnyja pałački), hety praces parušajecca. Rehularnaje miechaničnaje ŭździejańnie moža parušyć naturalny praces vychadu siery i pryvieści da jaje nazapašvańnia i ŭtvareńnia ščylnych siernych korkaŭ. Heta, u svaju čarhu, vyklikaje śvierb, bol abo navat časovaje źnižeńnie słychu, patrabujučy prafiesijnaha pramyvańnia ŭ kabiniecie ŭrača.
Akramia ryzyki ŭźniknieńnia korkaŭ, isnuje niebiaśpieka infiekcyj. Heta asabliva aktualna pry vykarystańni papularnych piennych biervušaŭ, jakija pierad uviadzieńniem nieabchodna ściskać palcami, kab jany raspravilisia ŭžo ŭ vuchu.
Jak tłumačać śpiecyjalisty, kali ruki niedastatkova čystyja, u słychavy kanał lohka zanieści infiekcyju. Akramia taho, pastajannaje treńnie moža paškodzić naturalny achoŭny barjer skury i vyklikać vonkavy atyt — zapaleńnie słychavoha kanała (tak zvanaje «vucha płyŭca», navat biez kantaktu z vadoj).
Kamu treba być asabliva aściarožnymi
Śpiecyjalisty nie zaklikajuć całkam admaŭlacca ad biervušaŭ. Jany zastajucca karysnym instrumientam dla abarony słychu ŭ šumnych umovach, naprykład, na budaŭničych placoŭkach, kancertach abo ŭ horadzie ź intensiŭnym šumam. Dla bolšaści ludziej epizadyčnaje vykarystańnie nie niasie pahrozy. Prablemy ŭźnikajuć mienavita pry rehularnaści.
Ale jość hrupy, jakim varta być asabliva ŭvažlivymi:
ludzi, što hienietyčna vypracoŭvajuć šmat vušnoj siery;
tyja, chto ŭžo mieŭ prablemy ź siernymi korkami;
ludzi paśla apieracyj na vuchu abo surjoznych traŭmaŭ;
tyja, chto pakutuje ad častych vušnych infiekcyj.
Im lepš paraicca sa śpiecyjalistam, pierš čym karystacca bierušami navat pieryjadyčna.
Što zamiest biervušaŭ
Jak tłumačać ekśpierty, unačy mozh usprymaje stabilny fonavy huk abo cišyniu jak sihnał biaśpieki. Kali vy karystajeciesia bierušami, kab zahłušyć šum, jość, mahčyma, bolš biaśpiečnyja alternatyvy.
Zamiest błakavańnia słychavoha prachodu ekśpierty rajać źviarnuć uvahu na alternatyŭnyja sposaby stvareńnia kamfortnaha asiarodździa dla snu. Bolš biaśpiečnym varyjantam ličycca vykarystańnie hienierataraŭ biełaha šumu abo zvyčajnaha vientylatara, huk jakich dapamahaje zhładzić rezkija šumy zvonku.
Taksama varta pakłapacicca pra hukaizalacyju pamiaškańnia, naprykład, źniščyć ščyliny ŭ voknach i dźviarach. U vypadku z chrapam partniora časam adzinym rašeńniem dla zachavańnia zdaroŭja i jakasnaha snu zastajecca arhanizacyja spalnych miescaŭ u roznych pakojach.
Ciapier čytajuć
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna2929
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna29
Zialenski: Ja nie budu kazać, jakim sposabam, ale našyja ludzi zajmalisia tym, kab try-čatyry retranślatary ŭžo nie pracavali na terytoryi Biełarusi22
Kamientary
Siera na biarušach źjaŭlajecca zranku i ja prosta ich myju raz-poraz. Pryčym vykarystoŭvaju adnuju i tuju ž paru ŭsie hady:)
Idealnaja pryłada, kab spać spakojna navat pry dyktatury.