Prezidencki spartyŭny kłub Dźmitryja Łukašenki stvaryŭ mierč dla biełaruskich VNU
U 2017—2018 hadach adrazu ŭ troch vyšejšych navučalnych ustanovach Biełarusi źjaviŭsia svoj univiersitecki mierč ź firmovaj simvolikaj — brendavanaje adzieńnie i suvienirnaja pradukcyja. Prodaž išoŭ praz studenckija kramy ŭ karpusach VNU.
Pieršaprachodcam staŭ BDUIR. Śledam za im padciahnulisia Mieduniviersitet i BNTU. Jak paviedamlała pres-słužba BDUIR, «ideju stvaryć taki punkt prapanavała kampanija «Univiersiteckija tradycyi», jakaja, u svaju čarhu, pieraniała jaje z dośviedu jeŭrapiejskich VNU».
«Biuro» vyśvietliła, što ŭ momant adkryćcia punktaŭ ź mierčam «Univiersiteckija tradycyi» mieli troch ułaśnikaŭ. Pieršy — Prezidencki spartyŭny kłub, biazźmiennym kiraŭnikom jakoha bolš za dvaccać hadoŭ źjaŭlajecca Dźmitryj Łukašenka.
Druhaja firma — «Sajuztrejd». Jaje asnoŭny vid dziejnaści — hurtovy handal inšymi bytavymi tavarami. Adnak my vyśvietlili, što kampanija źjaŭlajecca partnioram «Jandeks.Taksi» — jana maje ŭłasny aŭtapark i zajmajecca padboram i najmam kiroŭcaŭ. Firmu zasnavaŭ Jaŭhien Kukuškin. Vyvučyŭšy jaho bijahrafiju, «Biuro» moža śćviardžać, što firma «Sajuztrejd», jak i sam Kukuškin, źviazanyja ź Dźmitryjem Łukašenkam.
Jaŭhien Kukuškin byŭ vychavancam SDZIUŠAR «Junactva» — adnoj z samych tytułavanych chakiejnych škoł Biełarusi, jakaja vypuściła mnostva zorak nacyjanalnych zbornych, NCHŁ i KCHŁ. U pačatku 90‑ch jon navat sprabavaŭ rabić prafiesijnuju karjeru ŭ chakiei, ale paśla padaŭsia ŭ dziaržaparat.
Dziakujučy Aljansu rasśledavalnikaŭ Biełarusi žurnalisty daviedalisia, što ŭ pačatku nulavych Jaŭhien Kukuškin zajmaŭ pasadu inśpiektara ŭ kamitecie pa kaštoŭnych papierach pry Saviecie ministraŭ RB. Ale ŭ 2002 hodzie jaho zatrymali supracoŭniki KDB za sprobu pradać «rasijskim biznesoŭcam» vajskovuju dziaržaŭnuju tajamnicu pra dziejnaść abaronnaha pradpryjemstva «Pielenh». Na ŭhodzie Kukuškin płanavaŭ zarabić 4,3 tysiačy dalaraŭ.
Kukuškina asudzili na 5 hadoŭ pavodle artykuła 433 KK RB — atrymańnie niezakonnaha ŭznaharodžańnia słužboŭcam dziaržaparatu. Adnak, jak vyśvietliła «Biuro», eks-čynoŭnik nie sieŭ, a atrymaŭ tyja samyja 5 hadoŭ umoŭna. U 2004 hodzie, kali skončyŭsia vyprabavaŭčy termin, sudzimaść jamu anulavali.
Paśla skandału z kryminalnaj spravaj Jaŭhien Kukuškin viarnuŭsia ŭ sport. Užo ŭ pačatku dziasiatych jon hulaŭ za amatarskuju chakiejnuju kamandu «Rubiež» na pazicyi abaroncy. U adkrytych krynicach niama infarmacyi, što jon zajmaŭ u kłubie niejkuju administracyjnuju pasadu, adnak my vyśvietlili, što jurasoba «Rubiaža» była źviazanaja z numaram telefona Kukuškina.
Paralelna z hetym jon raźvivaŭ u Biełarusi žanočy chakiej — byŭ hienieralnym dyrektaram adzinaha ŭ Biełarusi žanočaha chakiejnaha kłuba «Pantera». Kamanda praisnavała z 2010 da 2013 hoda i była rasfarmavanaja z-za adsutnaści finansavańnia.
Jak minimum apošnija čatyry hady Jaŭhien Kukuškin zajmaje pasadu staršyni savieta ŭ amatarskaj chakiejnaj kamandzie «Ščyt». U 2025 hodzie jon taksama značyŭsia ŭ «Ščycie» jak trenier na 0,25 staŭki — jaho miesiačny akład składaŭ 1860,6 biełaruskaha rubla. Mienavita ŭ hetaj kamandzie hulaje jahony partnior pa studenckich kramkach ź mierčam — Dźmitryj Łukašenka. Adras rehistracyi jurydyčnaj asoby «Ščyta» — u susiednim kabiniecie z «Univiersiteckimi tradycyjami», u internacie BNTU na praśpiekcie Niezaležnaści, 63.
Treciaja firma, jakaja vałodała «Univiersiteckimi tradycyjami», — ZAT «Abłrapsahraservis». Hetaja jurydyčnaja asoba zajmajecca vytvorčaściu alejaŭ i šrotu. Struktura ŭłasnaści ZAT nie praduhledžvaje raskryćcia kancavych bienieficyjaraŭ, adnak «Abłrapsahraservis» źviazany z elektronnaj poštaj [email protected].
Hety adras vykarystoŭvaŭsia dla rehistracyi niekalkich jurydyčnych asob, źviazanych ź Jaŭhienam Kukuškinym i Dźmitryjem Łukašenkam: «Univiersiteckija tradycyi», «Amatarski kłub «Ščyt» i «Sport-sistem». Apošniaja vałodała dolaj va «Univiersiteckich tradycyjach» da «Abłrapsahraservisa». Z 2011 da 2023 hoda «Sport-sistem» u rozny čas vałodali jurydyčnyja asoby chakiejnych kłubaŭ «Rubiež» i «Ščyt», jakija taksama źviazanyja z Kukuškinym i Łukašenkam.
Takim čynam, usie try ŭłaśniki, jakija adkazvali za stvareńnie i prodaž mierču biełaruskich VNU, naŭprost ci ŭskosna źviazanyja ź siarednim synam Alaksandra Łukašenki.
«Biuro» vyvučyła finansavuju spravazdačnaść «Univiersiteckich tradycyj», kab acanić, nakolki prybytkovaj była ideja adzieć biełaruskich studentaŭ u mierč svaich alma-matar. Na žal, redakcyja nie maje dakumientacyi za pieryjad adkryćcia šopaŭ. Adnak finansavyja dadzienyja pačynajučy z 2023 hoda taksama vielmi pakazalnyja.
U 2023 hodzie vyručka «Univiersiteckich tradycyj» skłała 52 tysiačy rubloŭ, a čysty prybytak — usiaho dźvie tysiačy rubloŭ.
U nastupnyja hady finansavaja situacyja značna pahoršyłasia. U 2024 hodzie kampanija atrymała ŭžo 10 tysiač vyručki i straty na 5 tysiač rubloŭ. 2025 hod «Univiersiteckija tradycyi» skončyli z dachodam 6 tysiač rubloŭ i čystym prybytkam na 3 tysiačy rubloŭ.
Toje, što biznes-ideja pravaliłasia, uładalniki, zdajecca, zrazumieli jašče raniej. Akaŭnty šopaŭ u «Instahramie» pierastali abnaŭlacca z 2022 hoda. U lutym 2024 hoda «Univiersiteckija tradycyi» zakryli ŭsie stacyjanarnyja punkty i zarehistravali opcyju handlu biez vykarystańnia handlovaha abjekta — ciapier zamovy, kali takija majucca, ažyćciaŭlajucca praz asabistyja paviedamleńni ŭ sacyjalnych sietkach.
Kamientary