Byłoha prezidenta Irana aryštavali za supracu z «Masadam» — The New York Times
Pavodle paviedamleńnia vydańnia The New York Times sa spasyłkaj na vysokapastaŭlenych iranskich i amierykanskich čynoŭnikaŭ, były prezident Irana Machmud Achmadziniežad byŭ aryštavany Korpusam vartavych isłamskaj revalucyi pa padazreńni ŭ suviaziach ź izrailskaj vyviedkaj «Masad».
Vydańnie śćviardžaje, što apošnija hady izrailski bok nibyta padtrymlivaŭ kantakty z Achmadziniežadam i finansavaŭ jaho pajezdki i pražyvańnie. Pavodle krynic haziety, u Izraili razhladali jaho jak adnaho z mahčymych palitykaŭ, jaki moh by adyhrać rolu ŭ vypadku źmieny ŭłady ŭ Iranie.
Taksama paviedamlajecca, što pradstaŭniki «Masada» niekalki razoŭ sustrakalisia z Achmadziniežadam za miežami Irana, u tym liku ŭ Vienhryi i Hvatemale. Pavodle viersii vydańnia, adna z takich sustreč adbyłasia ŭ Budapiešcie ŭ 2024 hodzie padčas mižnarodnaj klimatyčnaj kanfierencyi, a kantakty praciahvalisia i ŭ 2025 hodzie.
The New York Times adznačaje, što adnosiny Achmadziniežada z kiraŭnictvam Irana na praciahu apošnich hadoŭ byli napružanymi. Choć jaho ŭpłyŭ byŭ abmiežavany, jon praciahvaŭ udzielničać u pracy adnaho z daradčych orhanaŭ pry viarchoŭnym kiraŭnictvie krainy.
Pavodle materyjału haziety, padčas avijaŭdaraŭ pa Iranie ŭ lutym 2026 hoda izrailskaja avijacyja naniesła ŭdar pa rezidencyi Achmadziniežada. Paśla hetaha jaho vyvieźli ź miesca zdareńnia na aŭtamabili. Vydańnie taksama śćviardžaje, što paźniej jon rasčaravaŭsia ŭ dziejańniach izrailskaha boku.
Akramia taho, paviedamlajecca, što na pachavańni viarchoŭnaha lidara Irana Ali Chamieniei Achmadziniežad niečakana źjaviŭsia siarod udzielnikaŭ žałobnaj pracesii:
«U minuły paniadziełak jon nienadoŭha i niečakana źjaviŭsia ŭ składzie pachavalnaj pracesii ajatały Chamieniei. Na videazapisach pracesii było bačna Achmadziniežada, apranutaha ŭ toŭstuju kurtku pry śpiocy ŭ +32 hradusy, ź miedycynskaj maskaj, spuščanaj na padbarodak. Dva inšyja byłyja prezidenty Irana, jakija ciapier žyvuć — Chasan Ruchani i Machamad Chatami, — nie byli zaprošanyja i nie źjavilisia ni na adnoj z pachavalnych cyrymonij. Pry hetym Achmadziniežad stajaŭ, schiliŭšy hałavu i nie pramaŭlajučy nivodnaha słova, u ačapleńni ludziej, jakija, vidavočna, byli achoŭnikami», — padsumavała vydańnie.
Kamientary