Źniavoleny kiraŭnik ZROBIM architects pradaje čarhovuju majomaść — učastak pad turystyčny kompleks na Vilejcy
U sacsietkach suzasnavalnika viadomaha architekturnaha biuro ZROBIM architects Andreja Makoŭskaha (viadomaha jak Andruś Bezdar), jaki znachodzicca ŭ SIZA, źjaviłasia novaja abjava. Hetym razam da prodažu prapanujecca nadzieł pad turystyčny kompleks na bierazie Vilejki.
Zhodna z dopisam u akaŭncie, jaki viadzie jaho žonka Alena, havorka idzie pra pierśpiektyŭnuju placoŭku dla raźvićcia turyzmu: «Siabry, pradaju ŭčastak pad Nomad House na Vilejcy! Vielmi pryhožaje miesca na bierazie raki. Ja baču ŭ hetaj ziamli vielizarny patencyjał i budu rady, kali tam pabudujecca značny dla Biełarusi turystyčny abjekt».
Zacikaŭlenym prapanujuć pisać u dyrekt.
Heta ŭžo nie pieršy bujny abjekt, jaki Andrej Makoŭski vymušany vystavić na prodaž paśla svajho aryštu.
U červieni 2026 hoda ŭ jahonych sacsietkach źjaviłasia abjava ab prodažy niedabudavanaj viły na tajłandskim vostravie Pchukiet u elitnym kompleksie Botanica Pru Jampa.
Pieraśled kiraŭnictva i supracoŭnikaŭ ZROBIM architects pačaŭsia ŭ krasaviku 2026 hoda. Tady siłaviki zatrymali kala 50 čałaviek, a samo papularnaje architekturnaje biuro abvinavacili ŭ atrymańni «niaŭličanaha prybytku» na sumu 6 miljonaŭ dalaraŭ i vypłacie zarobkaŭ u kanviertach. Ahulnuju škodu biudžetu acanili bolš jak na 5 miljonaŭ rubloŭ.
Sam Andrej Makoŭski zastaŭsia pad vartaj. Paźniej u jaho akaŭncie źjaviŭsia paviedamleńnie «Pryvitańnie ź SIZA! Płacicie padatki całkam, rabiaty».
Sacsietki ad jaho imia praciahvaje vieści, jak vyhladaje, žonka Alena. Kampanija ZROBIM architects pry hetym pakul praciahvaje svaju pracu.
Kamientary