Pucin paabiacaŭ adkazvać na ŭkrainskija ŭdary pa Rasii «ŭ niekalki razoŭ macniej»
Prezident Rasii Uładzimir Pucin zajaviŭ, što ŭ adkaz na ŭdary ŭkrainskich bieśpiłotnikaŭ pa rasijskaj terytoryi Rasija budzie nanosić jašče bolš maštabnyja ŭdary pa Ukrainie. Pavodle jaho słoŭ, adkaz budzie lustranym, ale ŭ niekalki razoŭ macniejšym, i, jak jon śćviardžaje, ukrainski bok užo adčuvaje nastupstvy takich dziejańniaŭ, paviedamlaje The Moscow Times.
«Kudy b jany ni sprabavali nanosić udary na terytoryi RF, my budziem adkazvać lustrana, tolki ŭ niekalki razoŭ mahutniej. Praciŭnik budzie heta adčuvać. Užo adčuvaje, spadziajusia», — skazaŭ Pucin.
Pucin taksama pryznaŭ, što ataki na rasijskija naftapierapracoŭčyja zavody vyklikali ciažkaści z zabieśpiačeńniem krainy palivam. Adnak, na jaho dumku, situacyja pastupova stabilizujecca dziakujučy mocnaj enierhietyčnaj infrastruktury.
Akramia taho, jon paviedamiŭ, što Rasija, maŭlaŭ, stvaraje novuju sistemu pastavak paliva ŭ Krym, jakaja, pavodle jaho słoŭ, budzie lepš abaronienaja ad mahčymych udaraŭ. Pry hetym nijakich padrabiaznaściaŭ pra jaje abo terminy zapusku jon nie paviedamiŭ.
Prablemy z palivam u Rasii ŭźnikli paśla sieryi ŭkrainskich udaraŭ pa naftapierapracoŭčych zavodach i inšych abjektach naftavaj infrastruktury. 6 lipienia byŭ atakavany navat Omski NPZ — najbujniejšy ŭ krainie, a raniej udarami byli zakranutyja i inšyja bujnyja pradpryjemstvy ŭ roznych rehijonach Rasii. Častka zavodaŭ była vymušanaja časova spynić pracu abo skaracić abjomy pierapracoŭki nafty.
Na fonie hetaha ŭ mnohich rehijonach krainy ŭźnikli ciažkaści z prodažam paliva. U šerahu rasijskich abłaściej byli ŭviedzienyja abmiežavańni na prodaž bienzinu, u inšych paviedamlałasia pra pieraboi z pastaŭkami, zakryćcio asobnych aŭtazapravak i rost cen.
Pavodle zajavy hałoŭnakamandujučaha Uzbrojenych sił Ukrainy Alaksandra Syrskaha, za pieršyja šeść miesiacaŭ 2026 hoda ŭkrainskija vajskoŭcy nanieśli ŭdary pa 697 abjektach na terytoryi Rasii. Pavodle jaho acenki, pramyja i ŭskosnyja ekanamičnyja straty ad hetych atak pieravysili 6,1 miljarda dalaraŭ ZŠA.
U Syzrani paśla ataki dronaŭ haryć naftapierapracoŭčy zavod
Pad načnym udaram dronaŭ apynulisia try bujnyja naftavyja abjekty na poŭdni Rasii
Sarataŭski NPZ prypyniŭ pracu paśla ataki ŭkrainskich dronaŭ
Syrski ličyć, što rasijanie buduć nastupać na Čarnihaŭščynu z Branskaj vobłaści. A voś ź Biełarusi — naŭrad ci
Vajna va Ukrainie dahnała pa praciahłaści Pieršuju suśvietnuju
Kamientary
«Kali Karaleŭskija vajenna-pavietranyja siły buduć skidvać dźvie tysiačy, try tysiačy ci čatyry tysiačy kiłahramaŭ bombaŭ, to my budziem skidvać 150 tysiač, 180 tysiač, 230 tysiač... tak, adzin miljon kiłahramaŭ za adnu noč.»
Padajecca, tavaryšu Pucinu jość jašče čamu pavučycca ŭ svajho vialikaha nastaŭnika.