Biełteleradyjokampanija prakamientavała infarmacyju pra spynieńnie tranślacyj imšy na radyjo
Biełteleradyjokampanija vystupiła z aficyjnaj zajavaj, u jakoj nazvała infarmacyju pra spynieńnie tranślacyj śviatoj imšy na Biełaruskim radyjo «sfabrykavanaj pravakacyjaj». Pry hetym i vierniki, jakija słuchali fizičny efir, i raskład na sajcie radyjo try tydni zapar fiksavali adsutnaść nabaženstvaŭ i zamienu ich na kłasičnuju muzyku, piša Katolik.life.
Pavodle partała Katolik.life, Pieršy nacyjanalny kanał Biełaruskaha radyjo try tydni zapar nie tranślavaŭ a 8:15 niadzielnuju imšu ź minskaha archikatedralnaha kaścioła. Zamiest słužby ŭ fizičnym efiry hučała kłasičnaja muzyka.
Pry hetym, na sajcie radyjo ŭ chvilinnym raskładzie minułych efiraŭ zamiest prahramy «Katalickaja propaviedź» značyłasia «Tematyčnaja rubryka».
U samim ža archikatedralnym kaściole pra spynieńnie efiraŭ nie čuli — śviatary praciahvali adpraŭlać słužbu pa siekundamiery, kab ukłaścisia ŭ radyjotajminh.
Dziaržaŭnaje radyjo ŭ adkaz abvinavaciła resursy, jakija napisali pra prablemu, u «raspaŭsiudzie zaviedama łžyvaj infarmacyi».
Pavodle viersii BT, tranślacyja nikudy nie źnikała, a krytyki prosta nie słuchali radyjo ŭ Biełarusi i zrabili pamyłkovyja vysnovy pavodle sajta.
«Vidavočna, što aŭtary ŭkidu nie majuć realnaj mahčymaści słuchać radyjoefir na terytoryi Respubliki Biełaruś, u suviazi z čym spasyłajucca ŭsiaho tolki na mietadanyja z sajta Pieršaha nacyjanalnaha kanała Biełaruskaha radyjo, dzie tranślacyja zhadvajecca jak «tematyčnaja rubryka», što źjaŭlajecca techničnym paznačeńniem pramoha efiru», — piša pres-słužba Biełradyjokkampanii.
Pradstaŭniki radyjo nastojvajuć, što prahrama «Katalickaja propaviedź» vychodziła i vychodzić a 8:15 bieź źmien.
Jany nazvali infarmacyju pra spynieńnie tranślacyj «naŭmysna sfabrykavanaj pravakacyjaj, nakiravanaj na raskoł hramadstva praź iłžyvyja abvinavačvańni».
Kamientary