Bialacki: Zakryli Honar, LSTR Adzenne i Ragna — rusifikacyja praciahvajecca
U lipieni 2026 hoda try viadomyja biełaruskija brendy adzieńnia i etna-tavaraŭ amal adnačasova abviaścili pra spynieńnie svajoj pracy. Aficyjna pryčyny zakryćcia kamandy prajektaŭ nie kamientavali, adnak pravaabaroncy i niezaležnyja ŚMI źviazvajuć heta z praciaham cisku na biełaruskuju kulturu i biznes, źviazany z nacyjanalnaj identyčnaściu, piša «Viasna».
10 lipienia 2026 hoda krama sučasnaha biełaruskaha adzieńnia Honar napisała ŭ svaich sacsietkach, što spyniaje pracu z 20 lipienia.
Praz dva dni źjaviłasia infarmacyja pra zakryćcio LSTR. Pra heta jaho stvaralniki abviaścili ŭ instahramie. Usiaho dva tydni tamu LSTR prezientavali novy prynt dla Kupalla.
U toj ža čas začyniła svoj fizičny punkt etnakrama Ragna, jakaja pracavała ŭ Minsku na vulicy Suchoj na praciahu 13 hadoŭ. Jana była pieršaj padobnaj placoŭkaj u krainie.
Aproč taho, pravaabaroncam «Viasny» stała viadoma, što ŭładalnik adnoj z kramaŭ byŭ zatrymany siłavikami dla dopytu nakont jahonych sacsietak i kantaktaŭ. Paśla patrabavańnia zakryć biznes jaho adpuścili.
«Režym pakazvaje svaju niesamastojnaść»
Staršynia Pravaabarončaha centra «Viasna» i łaŭreat Nobieleŭskaj premii miru Aleś Bialacki nazvaŭ heta «čarhovym krokam rusifikacyi Biełarusi».
«Heta sumnyja i tryvožnyja źviestki, jakija pakazvajuć, što nastup na biełaruskuju kulturu praciahvajecca va ŭsich prajaŭleńniach. Hetym razam čarha dajšła da nacyjanalnaha adzieńnia i simvoliki. U hety ž čas praciahvajuć źniščacca biełaruskija kniharni i vydaviectvy, biełaruskija knižki pastajanna ŭnosiacca ŭ ekstremisckija śpisy — jany faktyčna zabaronienyja na terytoryi Biełarusi. Ciapier sprava dajšła da adzieńnia i prykładnoha mastactva.
Heta čarhovy krok pa rusifikacyi Biełarusi, jaki pravodzicca rukami biełaruskich uładaŭ. Viadoma, heta prahrama źniščeńnia ŭsiaho biełaruskaha, jakaja praciahvajecca bolš za 200 hadoŭ. Tak režym pakazvaje svaju niesamastojnaść i poŭnuju zaležnaść ad impierskich naratyvaŭ, jak u halinie prykładnoha mastactva, tak i ŭsiaho, što źviazana ź vizualizacyjaj biełaruskaj kultury.
U takich umovach varta supraciŭlacca hetamu i baranić svajo ŭsimi mahčymymi formami».
Čym zajmalisia začynienyja kramy LSTR Adzieńnie, Honar i Ragna
Kramy LSTR Adzieńnie, Honar i Ragna stali kultavymi prajektami dla biełaruskaj kulturnaj prastory, tamu što raźvivali nacyjanalnyja tradycyi praz sučasnaje adzieńnie.
LSTR i Honar stvarali stylnaje brendavaje adzieńnie ź biełaruskimi matyvami, a Ragna pracavała jak etna-placoŭka i krama suvieniraŭ, dzie pradavali svaju pradukcyju narodnyja majstry.
Ich amal adnačasovaje zakryćcio stała čarhovym prykładam vyciskańnia niezaležnaha biełaruskaha biźniesu i nacyjanalnaha kampanienta z publičnaj prastory.
Ciapier čytajuć
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?1414
Kamientary