Były ziać Šejmana maje DNŽ u Litvie. A jakija biznesy jon viadzie?

Chto taki Andrej Šymanovič

Šymanovič naradziŭsia ŭ 1987 hodzie ŭ Minsku, vučyŭsia ŭ Łondanie (Univiersitet karalevy Maryi), paźniej pracavaŭ kansultantam u inviestfirmie Bowline Capital Partners.

U 2016 hodzie ažaniŭsia z Volhaj Šejman — dačkoj Viktara Šejmana, adnaho z najbližejšych paplečnikaŭ Łukašenki.

Pavialičyć

Šymanovič šmat padarožničaŭ razam sa svaim cieściem Viktaram Šejmanam i jahonym synam Siarhiejem — pa danych «Kibierpartyzanaŭ», heta dziesiatki sumiesnych pajezdak, uklučajučy pieralot 2016 hoda, źviazany z pačatkam zołatazdabyvalnaha prajekta Šejmana ŭ Zimbabve.

Pavialičyć

Pieršy biznes — špijonski dadatak mSpy

U 2011 hodzie Šymanovič staŭ suzasnavalnikam mSpy — servisu dla schavanaha sačeńnia za čužymi telefonami (paviedamleńni, hieałakacyja, zvanki i h. d.), jaki pazicyjanavaŭsia jak «baćkoŭski kantrol». Ale ŭ vyniku dadatak stali masava vykarystoŭvać dla sačeńnia za partniorami i supracoŭnikami (baćki, jakija niepakoilisia pra svaich dziaciej, składali tolki 40% klijentaŭ dadatku).

Servis pieražyŭ try bujnyja ŭciečki danych (2015, 2018, 2024), jakija zakranuli sotni tysiač i miljony karystalnikaŭ.

U 2015 hodzie Šymanovič zasnavaŭ vienčurny fond WeRocks, inviestavaŭ u startapy, źviazanyja sa zboram danych (Bluesmart, GeoZilla, Placemeter i inšyja).

Biełaruskija ŚMI ŭklučali jaho ŭ rejtynhi maładych paśpiachovych biznesoŭcaŭ.

Jakija jašče ŭ jaho prajekty

U 2018 hodzie jon stvaryŭ dźvie źviazanyja kampanii — biełaruskuju Mobyrix i litoŭskuju Appvillis, jakija zvonku vyhladajuć jak roznyja firmy, ale faktyčna pracujuć jak adzinaja struktura. Biełaruski ofis raspracoŭvaŭ prahramu, a litoŭski publikavaŭ jaje.

Fłahmanski pradukt — Nicegram, nadbudova nad telehramam. Karystalnik pryviazvaje da jaje svoj rachunak na mieśsiendžier — i atrymlivaje dadatkovyja mahčymaści nakštałt ŠI-pamočnika i dostupu da zabłakavanych kanałaŭ. Ale, ustaloŭvajučy Nicegram, karystalnik raskryvaje dadatku svaje imia, adras elektronnaj pošty i numar telefona, daje dostup da hieałakacyi, mikrafonu i kamiery, fota i videa na telefonie.

Inšyja prajekty Šymanoviča (eSIM Plus, InLab, StickyLab, ŠI-asistent Aivan) taksama naściarožvajuć z-za zališnich dazvołaŭ, pieradačy telemietryi ŭ rasijski Yandex AppMetrica, šyrokich licenziij na karystalnicki kantent.

Rasśledavalniki znajšli i afšornyja kampanii, mierkavana źviazanyja z Šymanovičam.

Lehalizacyja ŭ Litvie

U 2023 hodzie Šymanovič atrymaŭ DNŽ Litvy jak startapier (a ŭ 2025 padoŭžyŭ jaho), daviedaŭsia litoŭski rasśledavalnicki centr Siena.

DNŽ jamu dali mierkavana ŭžo paśla razvodu z Volhaj Šejman, što dazvoliła prajści mihracyjnuju pravierku — choć na momant stvareńnia litoŭskaha biznesu ŭ 2018‑m Šymanovič jašče byŭ členam siamji Šejmana.

Małodšaja siastra Andreja Šymanoviča skončyła mahistraturu ŭ Łondanie, a ciapier žyvie ŭ Varšavie i pracuje ŭ śfiery IT.

• 0
• 0
• 2
• 14
• 1
• 0
• 8
• 0